Wezareta Tenduristiyê ya Filistînê ya li Xezayê ragihand ku artêşa Îsraîlê di nava 24 saetan de li gelek deverên Xezayê komkujî pêk anîn.
Wezaretê da xuya kirin ku di van êrîşan de 82 filîstînî mirin û 234 jî birîndar bûn.
Hat ragihandin ku di êrîşa hewayî ya ku Îsraîlê li ser xaniyekî li Şerîda Xezayê pêk anî de zarok jî di nav de 14 sivîl mirin û gelek kes jî birîndar bûn.
Li aliyê din li Amerîkayê rêveberiya Serokdewlet Joe Biden ragihand ku ew kuştina Filistîniyên li Xezayê yên di şerê bi Hamas û Îsraîlê de weke jenosîd nabînin.
Di 220 rojên şerê li Îsraîl û Hemasê de bîlançoya windahiyan giran dibe.
Wezareta Tenduristiyê ya Filistînê ya li Xezayê ragihand ku artêşa Îsraîlê di nava 24 saetan de li gelek deverên Xezayê komkujî pêk anîn.
Wezaretê da xuya kirin ku di van êrîşan de 82 filîstînî mirin û 234 jî birîndar bûn.
Hat destnîşankirin ku di êrîşên Îsraîlê yên ji 7ê cotmehê vir ve li ser Şerîda Xezayê hejmara miriyan derket 35 hezar û 173’an û ya birîndaran jî derket 79 hezar û 61’an.
Di daxuyaniyê de her wiha hate gotin ku hîn jî di bin xirbeyan û li kêleka rê de kesên mirî hene, lê ji ber astengiya hêzên Îsraîlê, tîmên tenduristiyê û rayedarên parastina sivîl nikarin xwe bigihînin cenazeyan.
Li Xezayê di êrîşa hewayî ya Îsraîlê de 14 kes mirin
Di nûçeya ajansa fermî ya Filistînê WAFA’yê de hat diyarkirin ku balafirên şer ên Îsraîlê li Kampa Penaberan a Nuseyratê ya li navenda Şerîda Xezayê maleke 3 qatî bombebaran kir.
Di nûçeyê de hat ragihandin ku di encama êrîşa hewayî ya Îsraîlê ya li ser mala navborî de 14 sivîlên ku di nav wan de zarok jî hene jiyana xwe ji dest dan.
Di nûçeyê de hat destnîşankirin ku artêşa Îsraîlê bajarê Beyt Lahya li bakurê Şerîda Xezayê bi topan hedef girt û hat parvekirin ku topbarana li dijî Kampa Penaberan a Cibaliya ya li bakurê wê tevahiya şevê dewam kir.
NY: Li Refahê nêzî 450 hezar kes koçber bûne
Ajansa Alîkarî û Xebatê ya Neteweyên Yekbûyî ji bo Penaberên Filistînî yên li Rojhilata Nêzîk (UNRWA) li ser platforma medyaya civakî daxuyanî da.
Di daxuyaniyê de hat ragihandin ku ji destpêka êrîşan heta niha nêzî 450 hezar kes ji Refahê bi darê zorê koçber bûne û wiha hat gotin:
“Gel her tim bi westandin, birçîbûn û tirsê re rû bi rû ye. Ti cih ne ewle ye. Hêviyek tenê maye ew jî agirbesteke lezgîn e.”
Qesra Spî: Em difikirin ku li Xezayê qirkirin tune ye
Li aliyê din li Amerîkayê rêveberiya Serokdewlet Joe Biden ragihand ku ew kuştina Filistîniyên li Xezayê yên di şerê bi Hamas û Îsraîlê de weke jenosîd nabînin.
Di daxuyaniya Şêwirmendê Ewlehiya Neteweyî Jake Sullivan de hat gotin ku Amerîka dixwaze Hamas têk biçe.
Sullivan diyar kir ku ger Hamas dîlan berde, li Xezayê agirbest dikare pêk were û anî ziman ku divê cîhan bang li Hamasê bike ku vegere ser maseya danûstandinê û peymanê qebûl bike.
