Di serî de Qibris, 7 welatên Yekîtiya Ewropa bang li Brukselê dikin ku Koçberên Sûrî vegerînin warên wan.
Ev welat dibêjin, li hinek deverên Sûriyê ‘herêmên aram’ pêkhatine.
Ji ber vê yekê daxwaz dikin polîtîkaya ji bo Koçberên Sûrî cuda bê nirxandin.
7 welatên endamên Yekîtiya Ewropayê YE ragihandin ku divê rewşa Sûriyê ji nûve were nirxandin daku penaberên Sûriyê bi dilxwazî vegerin welatê xwe.
Awûstûrya, Komara Çek, Qibris, Yewnanîstan, Îtalya, Malta û Polonya diyarkirin ku divê rewşa penaberên Sûrî yên hewl didin xwe bigihînin welatên YE êdî “cuda” bê nirxandin.
Di civîna li Qibrisê de, welatên navborî bi daxuyaniyekê hevpar anîn ziman ku her çiqasî aramiya Sûrî bi giştî pêk nehatiye jî lê gavên erênî hene.
Rayedarekê hikûmeta Danîmarkayê ku beşdarî civînê bûyî, daxuyaniya hevpar îmze nekir.
Di mehên dawî de, pêleke zêde ya koçberên Sûrî ku di ser Libnanê re berê xwe didan Qibrisê pêk hat.
YE di destpêka meha Hezîranê de ji bo zêdekirina kontrola sînor ji bo Libnanê pakêteke alîkariyê ya 1 milyar euroyî amade kir.
7 welatên beşdar di civîna Qibrisê de jî teqez kirin ku divê YE alîkariyên darayî yên bo Libnanê li hember koçberan zêde bike.
Qibris ev demeke dirêj e zextê li YE’yê dike ku hin herêmên Sûriyê weke ‘cihên ewle’ qebûl bike.
Wezîrê Karê Hundir ê Qibrisê Constantinos Loannou ji ajansa AP re axivî û got;
Vegerên Sûriyan divê destpêkê bi dilxwazî be, lê dibe ku ev yek di qonaxeke paşîn de vegere polîtîkaya vegerandina mecbûrî.
Wezîrê Qibrisê bang li YE yê kir ku hîn rastir be û xwest li nava yekîtiyê Serokê Hikumeta Şamê neyê naskirin.
Li aliyê din her ku di van demên dawî de li Libnanê hestên dijî penaberan belav dibin, hejmara Sûriyeyiyên ku ji vî welatî derdikevin zêde dibe.
Berpirsên hikûmeta Libnanê herwiha daxwaz ji civaka navdewletî dikin ku alîkariya penaberên Sûriyê bikin ku vegerin welatê xwe.
Libnan tevî Tirkiyê yek ji wan welatên ku herî zêde penaberên Sûriyê lê hene.
