Hêzên Rizgariya Efrînê bi daxuyaniyekê ragahand ku dewleta Tirk a dagirker di malperên civakî de her wiha bi rê û rêbazên cûda ve, li ser navê hêzên wan bêyî ku fermiyeta xwe hebe, daxuyaniyan dide.
HRE’yê got: “Di serî de em kesên ku li ser navê hêzên me daxuyanî didin hişyar dikin.
Û bang li hemû gelê xwe dikin ku li hemberî şerê taybet, derew, dek û dolabên dijmin bi hişyarî tevbigerin.
Hêzên Rizgariya Efrînê bi daxuyaniyekê ragahandin ku dewleta Tirk ya dagirker li ser navê hêzên wan daxuyaniyan dide û şerê taybet dide meşandin.
HRE di daxuyaniya xwe de wiha got:
“Ji roja ku dewleta Tirk a dagirker û çeteyên ku ew xwedî dike, li pêş çavên cîhanê xakên me dagir kirin, lê li hemberî vê dagirkeriyê şerê me yê rizgariyê di çarçoveya qonaxa duyemîn de li hemberî êrîş û polîtîkayên înkar, îmha û qirkirinê bi hêzêk mezin berdewam dike.”
HRE: Dewleta Tirk a dagirker bi hemû sazî û dezgehên xwe şerê taybet dimeşîne
HRE diyar kir ku dewleta Tirk ji bo bandora çalakiyê me û berxwedana me kêm bike şerê taybet li ser gelê me dide meşandin û wiha anîn ziman:
“Heya niha gelek caran li herêmên dagirkirî derbên giran li artêşa Tirk a dagirker û çeteyên wê hatine xistin. Lê belê dewleta Tirk a dagirker bi hemû sazî û dezgehên xwe yên şerê taybet ve, ji bo vê berxwedanê û asta bandoriya çalakiyên hêzên me kêm bike, çi ji destê wê tê, dike.”
HRE: Em kesên ku li ser navê hêzên me daxuyanî didin hişyar dikin
HRE da zanîn ku dewleta Tirk li ser navê hêzên wan daxuyanî dide û şerê taybet dimeşîne û got:
“Bi taybetî di van demên dawiyê de, ji ber çalakiyên me yên bi bandor, di malperên civakî de her wiha bi rê û rêbazên cûda ve, li ser navê hêzên me bêyî ku fermiyeta xwe hebe, daxuyanî tên dayîn. Di serî de em kesên ku li ser navê hêzên me daxuyanî didin hişyar dikin. Dibe ku ew sazî û dezgehên wiha dikin bi yekser di bin bandora şerê taybet ê dijmin de bin.”
HRE: Em bang li gelê xwe dikin ku li hemberî şerê taybet bi hişyarî tevbigerin
Hêzên Rizgariya Efrînê di daxuyaniya xwe de bang li gel kir ku divê nekevin xefkên dewleta Tirk ya dagirker û wiha bi dawî kir:
“Di serî de em bang li hemû gelê xwe dikin ku heta daxuyaniyek fermî di malperên me de neyê dayîn, ji yên din bawer nekin. Carekî din jî li hemberî şerê taybet, derew, dek û dolabên dijmin bi hişyarî tevbigerin û li benda daxuyaniya fermî ya ku em bidin bin.”
