Li Dêrazorê, piştî ku ji aliyê QSD’ê ve 2019’an hate rizgarkirin ji saziyên jinan heta bi şaredarî, komun, meclîs û rêxistinên civakî yên sivîl gelek sazî hatin avakirin.
Rêxistinên Civakî yên Sivîl ên ji aliyê TEV-DEM’ê ve hatin avakirin, yek ji wan e.
Endama TEV-DEM’ê Seca El Huweydî diyar kir ku armanca wan ew e ku projeya neteweya demokratîk li gorî felsefeya Rêber Apo hîn bêhtir belav bikin û bixin meriyetê.
Di 2019’an de QSD’ê Dêra Zorê ji destê çeteyên DAIŞ’ê rizgar kir.
Lê hîn jî çi hêzên hikumeta Şamê çi jî komên cuda, dewlet û şaneyên DAÎŞ’ê timî êrîşî herêmê dikin.
Li gel hewldanên ji bo têkbirina aramiya herêmê jî Rêveberiya Xweser û xelkê herêmê di çarçoveya sîstema rêveberiya demokratîk de sîstema xwe ava dikin.
Endama Tevgera Civaka Demokratîk TEV-DEM’ê Seca El Huweydî derbarê vê yekê de axivî.
Seca El Huweydî diyar kir ku rêxistinên civakî yên sivîl ên li herêma Dêra Zorê ji sala 2021’ê û pê ve ava bûn û got:
“Me destpêkê bi sendîkayên pîşeyî destpê kir
Odeyên pîşeyî hatin avakirin û nûnerên her yekîtiyê di nava van odeyan cih girtin.
Hemû sazî di bin sîwana TEV-DEM’ê de li hev kom dibin û di çarçoveya qanûnên Rêveberiya Xweser de kar dikin.
Sala 2023’an di Konferansa TEV-DEM’ê de hevserokên rêxistinên civakî yên sivîl hatin hilbijartin û birêxistinkirina van saziyan bi dawî bû.”
“Hemû sazî di bin sîwana konfederalîzma civaka demokratîk de dicivin”
Endama TEV-DEM’ê anî ziman ku sazî hemû di bin sîwana Konfederalîzma Civaka Demokratîk de dicivin û wiha anî ziman:
“Ev saziyên civaka sivîl wê li qada siyasî bibin xwedî rol, di pêşketina herêmê de bibin xwedî gotin û bi partiyên siyasî re di nava têkiliyê de bin.
Sendîkaya cotkaran xwedî 60 hezar endamî ye.
Li herêmeke weke Dêra Zorê birêxistinkirina 60 hezar kesî bi vî rengî, destketiyeke mezin e.”
“Em ê projeya neteweya demokratîk li gorî felsefeya Rêber Apo hîn bêhtir belav bikin”
Seca El Huweydî destnîşan kir ku di serî de DAÎŞ, hikumeta Şamê û gelek hêzên din hewl didin li herêmê tevlîheviyê biafirînin û wiha pê de çû:
“Em li hemberî vê rewşê têdikoşin.
Rûspiyên eşîran xwedî li saziyan derketin û xwe weke parçeyek ji vê sîstemê dîtin.
Li Dêra Zorê jin tevlî hemû saziyan dibin ev jî encama têkoşînê ye.
Dema bê wê projeyên me yên hîn berfireh hebin.
Armanca me ya bingehîn ew e ku projeya neteweya demokratîk li gorî felsefeya Rêber Apo hîn bêhtir belav bikin û bixin meriyetê.”
