Dewletên sereke yên cîhanê ji bo agirbesta li Lubnanê li hev dicivin. Amerîka, Almanya û Fransayê di daxuyaniya xwe diyar dikin ku agirbesta di navbera Îsraîl û Hizbullahê de nêzîk e. Rayedarên Îsrarîlê jî dibêjin li ser agirbestê hikumetê bi serokatiya Netanyahu bicivin û biryarê xwe bidin.
Wezîra Karên Derve yê Almanyayê Annalena Baerbock ragihand ku li Lubnanê ku Îsraîl li dijî milîsên Hizbullahê şer dike, agirbest nêzîk bûye.
Hat diyarkirin ku hikûmeta Îsraîlê wê roja Sêşemê li ser mijarê biaxive.
Annalena Baerbock hêviya xwe anî ziman ku di demeke kin de çek li Lubnanê bêdeng bibin.
Baerbock ku ji bo civîna wezîrên karên derve yên welatên G7 li bajarê Fiuggi yê Îtalyayê bû, di daxuyaniya xwe ya derbarê operasyonên ku ji aliyê Îsraîlê ve li ser xaka Lubnanê tên kirin de got:
“Pêvajoya agirbestê ji çend roj û hefteyên berê hîn nêzîktir xuya dike.
Di van rojên dawî de di vî warî de têkiliyên min ên xurt hebûn.”
Medya Îsraîlî: Civata wezîran wê agirbestê gotûbêj bike
Her wiha kanala 12 ya televizyona Îsraîlê ragihand ku hikûmeta bi serokatiya Serokwezîr Netanyahu mijara agirbesta li Lubnanê xistiye rojeva xwe.
Nûnerê Daîmî yê Îsraîlê yê li Neteweyên Yekbûyî Danny Danon jî diyar kir ku “Ji bo agirbestê dawî li peywendiyên xwe nehatine, lê pêşketin çêbûne” û hikûmeta Îsraîlê wê li ser vê mijarê roja Sêşemê bicive.”
Washîngton: Em nêzî lihevkirinê ne
https://turkish.aawsat.com/arap-d%C3%BCnyasi/5085405-washington-ve-paris-l%C3%BCbnanda-ate%C5%9Fkes-i%C3%A7in-yap%C4%B1lan-m%C3%BCzakerelerde-%C3%B6nemli
Li aliyê din Amerîka û Fransa duh geşbîniya xwe diyar kiribûn ku di demeke nêzîk de agirbest di navbera Îsraîl û Hizbullahê de pêk were.
Di daxuyaniya Qesra Spî de hat diyarkirin ku danûstandinên ku rêveberiya Amerîkayê ji bo agirbestê di navbera Lubnan û Îsraîlê de dimeşîne erênî bûn û ji bo agirbestê pêşketin çêbûn.
Demeke kin piştî vê daxuyaniyê, çavkaniyên payebilind ên Lubnanê ragihandin ku tê çaverêkirin ku Serokê Amerîkayê Joe Biden û Serokomarê Fransayê Emmanuel Macron di nava 36 saetan de di navbera Îsraîl û Hizbullahê de agirbestê ragihînin.
Koordînatorê Ragihandina Stratejîk a Konseya Ewlehiya Neteweyî ya Qesra Spî John Kirby got:
“Em nêzî lihevkirinê ne. Meyla erênî ye û ber bi rêyeke rast ve diçe.
Lê belê hîn pêvajo bi dawî nebûye. Heta ku her tişt neqede tiştek bi dawî nabe.”
Fransa: Di danûstandinên agirbestê de pêşketinên mezin çêbûne
Ji aliyê din ve di daxuyaniya Serokomariya Fransayê de hat diyarkirin ku di danûstandinên agirbesta li Lubnanê de pêşketinên mezin çêbûne.
Di daxuyaniyê de hat gotin:
“Em bi hevkarên xwe yên Amerîkayê re di vî warî de xebatên xwe didomînin.
Em hêvîdar in ku hemû aliyên peywendîdar di zûtirîn dem de vê derfetê bi kar bînin.”
