Rêxistinên siyasî, jinan û yên civakî biryara desthilata Şamê ya erkdarkirina kujerê sekretera giştî ya Partiya Sûriyeya Pêşerojê Hevrîn Xelef ji bo erkeke leşkerî şermezar kir.
Partiya Sûriya Pêşerojê erkdarkirina çeteyê bi navê Hatim Ebû Şeqra ji bo erkeke leşkerî ya girêdayî desthilata Şamê, şermezar kir.
Partiya Sûriyeya Pêşerojê der barê mijarê de daxuyaniyek da.
Daxuyanî ji aliyê berdevka Meclisa Giştî ya Jinan a partiyê Fatima El Elî li avahiya partiyê li bajarê Reqayê bi amadebûna hejmarek ji endamên partiyê hate xwendin.
Partiyê ev biryar wek binpêkirina aşkera ya prensîbên edaletê û xelatkirina sûcdarên sûcên li dijî mirovahiyê nirxand.
Şaxê Partiya Sûriyeyê ya Pêşerojê li kantona Firatê, erkdarkirina çeteyê bi navê Ebû Şeqra şermezar kir û got ev kiryar “bêrêziyeke aşkera ye li hember qurbaniyan, bi taybet şehîd Hevrîn Xelef e. ”
Daxuyanî li Meydana Jina Azad a Kobanê ji aliyê seroka ofîsa partiyê ya kantona Firatê Şevîn Axasî ve hate xwendin û tê de tekez kir ku çeteyê bi navê Ebû Şeqra “ji bilî sûcdarekî şer ku bi sûcên xwe yên li dijî sivîlan tê naskirin ne tiştekî din e” û destnîşan kir ku erkdarkirina wî wek “hewldanek ji bo spîkirina dosyaya sûcên wî” ye.”
Koordînasyona Jinan a Rêveberiya Xweser a Bakur û Rojhilatê Sûriyê jî bi daxuyaniyeke nivîskî, erkdarkirina çete Hatim Ebû Şeqra wek rêveberê Firqeya 86’an a desthilata Şamê, bi tundî şermezar kir.
Daxuyanî ji aliyê seroka Koordînasyona Jinan a Rêveberiya Xweser Adalat Omer ve bi amadebûna hejmarek çalakvanên mafên mirovan û çalakvanên jin hat xwendin.
Di daxuyaniyê de hate gotin ku ku Sûriyeyê di qonaxeke hestyar re derbas dibe, û her hewlek ji bo spîkirin an bihêzkirina tawanbarên tawanên cengê dê bibe gefek li ser siberoja welat.
Di daxuyaniyê de hate destnîşankirin ku destê dewleta Tirk bi awayekî rasterast di ferzkirina çeteyên xwe di nava saziyên dewleta Sûriyê de heye.
Koordînasyona Jinan a Rêveberiya Xweser tekez kir ku ew ê tekoşîna li ser rêya şehîdên azadiyê yên jin berdewam bikin, her wiha tekez kir ku siberoja Sûriyê li ser tawanan nayê avakirin, lê belê bi dadwerî, hesabpirsîn û rêzgirtina ji mafên mirovan re tê avakirin.
Meclisa Malbatên Şehîdan û Buroya Jinan a Rêxistinên Civaka Demokratîk a kantona Tebqayê jî biryara desthilata Şamê bi tundî şermezar kirin.
Daxuyanî bi amadebûna nûnerên saziyên Rêveberiya Xweser, Meclisa Jinan a Zenûbiya û Meclisa Partiya Sûriyeya Pêşerojê li ber avahiya Rêxistinên Civaka Demokratîk a Tebqayê hate dayîn.
Li Mezara Şehîdan a Tebqayê jî, Meclisa Malbatên Şehîdan bi amadebûna nûnerên Rêveberiya Xweser, Partiya Sûriyeya Pêşerojê û Meclîsa Jinan a Zenûbiya daxuyaniyek da.
Endama Meclîsê Faten Şêx Nasir daxuyanî xwend û wiha got: “Ev biryar rewakirina terorê ye, û bêrêziyeke eşkera li fedakariya şehîdan e, di serî de şehîd Hevrîn Xelef ku sembola aştî, jiyana hevbeş û projeya biratiya gelan bû.”
