Nîqaşên civîna Rûsya û Ukraynayê ku li Stenbolê hate lidarxistin didome.
Di heman demê de her du alî disa bi êrişên tund dixwazin helwestên xwe bidin qebulkirin.
Rûsya ji bo pêkanîna agirbestê şertê vekişîna leşkerên Ukraynayê ji Donetsk, Luhansk, Zaporijya û Xersonê dike.
Cîgirê serokê konseya ewlehiya neteweyî ya Rûsyayê, Dmitry Medvedev, ragihand ku armanca hevdîtinên Stenbolê ew e ku “serkeftinek bilez û biryardar a Rûsyayê” misoger bike.
Medvedev got:
“Hevdîtinên Stenbolê ne ji bo gihîştina lihevkirinekê bi şertên xeyalî yên hin kesan e, lê ji bo misogerkirina serkeftina me ya bilez û hilweşîna tevahî ya rejîma neo-nazî ye.”
Dema ku Medvedev li ser Telegramê daxuyaniyek da, îdia kir ku êrîşa Ukraynayê ya li ser hêza wê ya hewayî jî dê were bersivandin.
Şandeyên Rûsya û Ukraynayê di 2’ê Hezîranê de, nêzîkî du hefte piştî civîna xwe ya yekem di nîvê Gulanê de, careke din li Stenbolê civiyan.
Aliyê Ukraynayê daxwaza xwe ya “agirbestek bê şert û merc li bejahî, li hewa û li deryayê ji bo herî kêm sê mehan” ji aliyê Rûsyayê re ragihand.
Rûsya ji bo agirbestê şertê vekişîna leşkerên Ukraynayê dike
Li hember vê yekê, aliyê Rûsî agirbesteke herêmî ya qismî ya “dido an sê rojan” pêşkêş dike da ku cenazeyên şervanên mirî werin wergirtin.
Şandeya Ukraynayê jî piştî hevdîtinan di daxuyaniyekê de ragihand ku her du alî li hev kirine ku cenazeyên 6 hezar leşkeran radest bikin.
Li gorî medyaya dewletê ya Rûsyayê, aliyê Rûsî destnîşan kir ku agirbesteke tevahî tenê wê were qebûlkirin ger leşkerên Ukraynayê ji Donetsk, Luhansk, Zaporijya û Xersonê vekişin.
Niha Rûsya van herêman qismî kontrol dike.
Di civîna duyemîn a Stenbolê de, Moskowê her wiha daxwaza garantiyek kir ku Ukrayna dê tevlî NATO nebe û dawî li piştgiriya leşkerî ya Rojava ji bo Kîevê were.
Daxwaz kir ku civîna din berî dawiya Hezîranê be
Wezîrê Parastinê yê Ukraynayê Rustem Umerov, ku di civîna Stenbolê de serokatiya şandeya ji Kîevê kir, daxwaz kir ku civîna din berî dawiya Hezîranê were lidarxistin.
Umerov her wiha got ku her du alî li hev kirine ku li ser amadekariyên civîna Pûtîn-Zelenskî nîqaş bikin.
Piştî civînê, Qesra Spî jî di derbarê civîna serokan de daxuyaniyek da.
Berdevka Qesra Spî Karoline Leavitt got ku heke serokên Rûsya û Ukraynayê razî bibin ku bicivin, Donald Trump dikare biçe Tirkiyê.
