Piştî merasima dîrokî ya gerîla ya çek şewitandinê Şandeya DEM Partî ya Îmraliyê dest bi danûstandinan kir.
Şandeyê îro bi Wezîrê Edaletê yê Tirkiyê, bi partiyên Gelecek û MHP’ê re hevdîtin pêk anîn.
Di hevdîtinan de asta ku pêvajo hatiye û mijara avakirina komîsyona li meclisê hate niqaşkirin.
Di çarçoveya pêvajoya Banga Aştî û Civaka Demokrtîk û piştî merasima gerîla ya dîrokî a çek şewitandinê Şandeya DEM Partî ya Îmraliyê dest bi hevdîtinan kir.
Şandeyê îro bi Wezîrê Edaletê yê Tirkiyê Yilmaz Tûnç re 45 deqe hevdîtin kir û piştî wê daxuyanî da.
“Ji bo pêşxistina aliyê hiqûqî û qanûnî wê wezîrê edaletê bi erka xwe rabe”
Endama şandeyê Perwîn Bûldan diyar kir wan hevdîtineke girîng pêk anî ye û got,
“Di vê pêvajoya ku wê komîsyon bê avakirin de, wezîrê edaletê xwedî roleke girîng e. Wezîr diyar kir ji bo ku ev pêvajo li ser bingeha hiqûqî û qanûnî bi pêş de biçe wê bi erka xwe rabe.”
Perwîn Bûldan: Piştî şewitandina çekan wê komîsyon bê avakirin
Perwîn Bûldan da zanîn pêvajo qonax bi qonax bi pêşde diçe û diyar kir piştî şewitandina çekan wê derbasî qonaxe nû bibe û ev qonax jî avakirina komîsyonê ye.
Mîthat Sancar: Wezareta edaletê di pêvajoyê de xwedî roleke krîtîk e
Endamê Şandeyê Mîthat Sancar jî diyar kir di vê qonaxa pêvajoyê de bingeha hiqûqî gelek girîng e û got,
“Ji bo pêvajo ber bi aştî, hiqûq û demokrasiyê ve pêş bikeve Wezareta Edaletê xwedî cihekî girîng e û xwedî roleke krîtîk e. Dema bingeha hiqûqî ya pêvajoyê bi xurtî bê danîn wê bi hêsanî bi pêşde biçe.”
Şandeya Îmraliyê bi Ehmed davûtoglû re hevdîtin pêk anîn
Şandeya Îmraliyê bi Serokê Partiya Gelecek Ehmed Davûtoglû re jî hevdîtin kir û piştî wê daxuyaniya hevpar hate dayîn.
Davûtoglû: Ji bo serketina pêvajoyê divê herkes hewldanan bike
Dawutoglû diyar kir pêvajoya ku hatiye destpêkirin hatiye qonaxeke krîtîk û ji bo serketina pêvajoyê divê herkes hewldanan bike û bi baldarî tevbigere.
Şandeya Îmraliyê divê muxalefet piştgiriya pêvajoyê bike
Endamên şandeyê jî ji bo pêşdeçûna pêvajoyê bal kişandin li ser girîngiya piştgiriya civakê û muxalefetê û hate gotin,
“Pêvajoya aştiyê niha derbasî qonaxeke din buye. Pêvajoya ji vê şûnde wê bi avakirina komîsyona li meclisê, entegrasyona demokratîk û derxistina qanûnên azadiyê temam bibe.
Şandeya Îmraliyê bi dewlet bahçelî re hevdîtin kirin
Şandeya Îmraliyê li meclisê bi serokê MHP’ê Dewlet Bahçelî re jî hevdîtin kirin.
Piştî hevdîtinê endama şandeyê Perwîn Bûldan daxuyanî da û got,
“Me li nêrînên erênî yên Birêz Bahçelî ên derbarê pêvajoyê de guhdar kir. Di dema avakirina komîsyonê de pêdiviya me bi danûstandinan heye. Ji bo serketina vê pêvajoya aştiyê em ê piştigirî û têkoşîna xwe bidomînin.
