Êrişên Rûsyayê tevî bangawaziya Amerîkayê ya ji bo agirbesta li Ukraynayê jî didome.
Hêzên Ukraynayê ragihandin ku Rûsya nêzîkî 400 balafirên bê mirov êriş pêk aniye.
Li aliyê din NATO’yê, diyar kir ku amadekarî ji bo radestkirina pergalên parastina hewayî ya Patriot di zûtirîn dem de bo Ukraynayê berdewam dikin.
Tevî banga Serokê Amerîkayê Donald Trump ji bo agirbesteke 50 rojî ya bidawîkirina pevçûnên li Ukraynayê, Rûsyayê di şeva 16’ê Tîrmehê de li seranserê Ukraynayê êrîşên hewayî yên berfireh da destpêkirin.
Di êrîşan de bi sedan balafirên bê mirov yên cûreya kamîkaze û moşekek balîstîk hatin bikaranîn.
Hêza Hewayî ya Ukraynayê ragihand ku wan nêzîkî 400 balafirên bê mirov yên cûreya Şahed ên ku ji hêla Rûsyayê ve ji deverên cûda hatine avêtin tespît kirine û piraniya wan ji hêla pergalên parastina hewayî ve hatine ruxandin.
Lêbelê, tê ragihandin ku hin ji balafirên bê mirov ên gihîştine hedefên xwe û bûne sedema qurbaniyên sivîl.
Yek ji êrîşên herî giran li ser bajarokê Dobropillia li herêma Donetskê hate kirin.
Li avahiyek apartmanan a bajêr ku ji ber bombeyeke 500 kîloyî lê ket, kesek hat kuştin û herî kêm 20 kes birîndar bûn.
Tîmên rizgarkirinê li kesên ku di bin kavilan de asê mane digerin.
Li gorî pisporan, Moskow armanc dike ku zexta leşkerî li ser Ukraynayê zêde bike û li ser erdê pozîsyonek danûstandinê ya bihêztir bi dest bixe, ev yek jî dibe sedema cezayên muhtemel ji aliyê Trump ve.
Ukraynayê diyar kir ku êrîşan hêviyên ji bo çareseriyek dîplomatîk bêtir qels kirine û ji welatên Rojava bersivên bihêztir û piştgiriya parastinê xwest.
Nato: Amadekarî ji bo radestkirina pergalên patriot bo Ukraynayê têne kirin
Generalê Amerîkî Alexus G. Grynkewich (aleksus Girînkewîç), Fermandarê Giştî yê Hêzên Hevpeyman ên Ewropayê yê NATO’yê, diyar kir ku amadekarî ji bo radestkirina pergalên parastina hewayî ya Patriot di zûtirîn dem de bo Ukraynayê berdewam dikin.
Girînkewîç di daxuyaniyekê de ji bo çapemeniyê behsa pergalên parastina hewayî yên Patriot ên ku tê plankirin ji Almanya bo Ukraynayê werin şandin kir.
Girînkewîç diyar kir ku ew bi Almanya re bi hevkariyek nêzîk dixebitin û got:
“Amadekarî ji bo radestkirina pergalên parastina hewayî ya Patriot di zûtirîn dem û bilez de bo Ukraynayê têne kirin.
Pêşniyara min ew e ku pergalên parastina hewayî di zûtirîn dem de werin radestkirin.”
Girînkewîç îdia kir ku Rûsya dê wekî “gef” bimîne her çend çareseriyek aştiyane li Ukraynayê hebe jî.
Trump: Hejmara patriotên bên şandin hîna nehatiye diyarkirin
Dema ku ji Serokê Amerîkayê Donald Trump hat pirsîn ka gelo ew ê moşekên parastina hewayî yên Patriot bişînin Ukraynayê, wî got,
“Hejmar hîn nehatiye diyarkirin, lê em ê hin ji wan bişînin ji ber ku ew hewceyê parastinê ne.
Lê Yekîtiya Ewropî wê bide. Em ê tiştekî nedin, lê em ê wan bişînin. Ev ê ji bo me karekî be.
Em ê Patriotên ku ew bi tundî hewce ne ji wan re bişînin.”
Trump teqez kir ku ew ji Serokê Rûsyayê Vladimir Putin bêhêvî ye û got:
“Min berê difikirî ku Putin kesek li pişt gotinên xwe heye.
Ew pir baş diaxive, lê paşê ew bi şev mirovan bombebaran dike. Em ji vê yekê hez nakin.”
