Li aliyê din berdevka Çapemeniyê ya Qesra Spî Karoline Leavitt ragihand ku Amerîka leşker naşîne Ukraynayê.
Hatiye îdîakirin ku civîna potansiyel a di navbera Zelenskî û Putin de dikare li Macaristanê were lidarxistin.
Li gorî Reutersê, ev agahî ji hêla rayedarekî payebilind ê rêveberiya Amerîkayê ve hatiye dayîn.
Lêbelê, Kremlinê hîn bi fermî hevdîtin piştrast nekiriye.
Serokê Fransayê Emmanuel Macron diyar kir ku civîn dikare “li Ewropayê” û welatekî bê alî were lidarxistin û got:
“Ev ne tenê îhtîmalek e, ew xwestekek hevpar e.”
Dibe ku li Swîsreyê be, ez Cenevreyê pêşniyar dikim. An jî welatekî din.”
Di heman demê de, Donald Trump piştî civîna xwe ya bi serokên Ewropî û Zelenskî re bi rêya telefonê bi Putin re axivî.
Trump ragihand ku amadekariyên civîna her du lîderan dest pê kirine, û dê lûtkeyeke sêalî di navbera Amerîka, Rûsya û Ukraynayê de were lidarxistin.
Li gorî AFPê, Putin ji Trump re jî gotiye ku ew amade ye bi Zelenskî re hevdîtin bike.
Serokwezîrê Alman Friedrich Merz got divê civîn di nav du hefteyên bê de pêk were û got:
“Lê ez ne bawer im ku serokê Rûsyayê wê cesaretê hebe ku gaveke wisa bavêje.”
Rûsya: Me danûstandinên bi Ukraynayê re red nekiriye
Her wiha Wezîrê Derve yê Rûsyayê Sergey Lavrov di hevpeyvînekê de got Moskowê ti xebatek “çi du alî be çi sê alî” li ser çareseriya Ukraynayê “red nekiriye”.
Lavrov teqez kir ku divê her têkiliyek ku rayedarên asta bilind tê de hebin bi qasî ku pêkan bi baldarî were amadekirin.
Lavrov dibêje heya ku ewlehiya Rûsyayê û mafên Rûsan li Ukraynayê neyên rêzgirtin, peymanên demdirêj nayên bidestxistin.
Qesra Spî: Leşkerên Amerîkî naşînin Ukraynayê
Li aliyê din Berdevka Çapemeniyê ya Qesra Spî Karoline Leavitt di civîna xwe ya rojane ya çapemeniyê de derbarê hevdîtinên aştiyê yên Ukrayna-Rûsyayê de daxuyanî da.
Karoline Leavitt diyar kir ku Donald Trump ji tîmê xwe yê ewlehiya neteweyî re talîmat daye ku bi Ewropayê re hevkariyê bikin û got:
“Trump bi eşkereyî diyar kiriye ku leşkerên Amerîkî naşînin Ukraynayê.
Lêbelê, em bê guman dikarin di hevrêzkirin û dayîna garantiyên ewlehiyê yên din de ji hevalbendên xwe yên Ewropî re bibin alîkar.”
Karoline Leavitt teqez kir ku hewlên ji bo hevdîtinek rasterast di navbera serokên Rûsya û Ukraynayê de di rojên pêş de berdewam in, û got:
“Trump her gav gotiye ku di vî şerî de deverên nakokî hene ku divê ji hêla van her du welatan ve werin nîqaşkirin û çareser kirin.
Ji ber vê yekê, ew dixwaze ku ev her du welat bi dîplomasiya rasterast tevbigerin.”
