Hêzên Israîlê şevê din li dijî Lubnanê êrişên hewayî pêk anîn.
Di encamê de 5 kes hatin kuştin û hejmarek kes birîndar bûn.
Artêşa Îsraîlê gelek deverên bajarokên Edlûn, Ensariye, El Xerayîb, Şeba û El Teyba yên Lubnanê, bombebaran kir.
Wezareta Tenduristiyê ya Lubnanê diyar kir ku di encama bombebaranê de hejmarek welatî ku Sûriyayî jî di nav de hatin kuştin.
Di heman êrişê de 3 jê zarok 7 welatiyên Lubnanî û 3 welatiyên Sûriyeyî birîndar bûn.
Li bajaroka Batir jî balafireke bêmirov a Îsraîlê welatiyek li ber mala wî bombebaran kir û hat kuştin.
Li bajaroka El Teyba jî di encama bomebarana balafiran de welatiyek hate kuştin.
Berdevkê Artêşa Israîlê Avichay Adraee derbarê êrişan de diyar kir ku hêzên wan bargehên Hizbullahê, bingehên fûzeyan û alavên endazyarî yên leşkerî bombebaran kirine.
Adraee îda kir ku cihên hatine bombebarankirin, gef û metirsî li ser Îsraîlê çêdikirin.
Li bajaroka Îtron jî hêzên Îsraîlê bi pêş ve çûn û malên welatiyan li nêzî Cil El Dêr ruxandin.
Îsraîl li Başûrê Lubnanê li nêzî hêzên ny 4 bombeyên destan avêtin
Li aliyê din dronên Îsraîlê li herêmekê li başûrê Lubnanê, li nêzî hêzên aşitiyê yên Neteweyên Yekbûyî, çar bombeyên destan avêtin.
UNIFILê, doh di daxuyaniyê de ragihand ku di êrîşê de kesek birîndar nebûye.
Hêza Demkî ya Neteweyên Yekbûyî li Lubnanê -UNIFIL bûyera ku sibeha Sêşemê qewimî, wekî “ji Mijdara borî ku şerê 14 mehî yê Îsraîl-Hizbullah bi dawî bû, êrîşeke herî giran a li dijî personelên NY’yê” binav kir.
Di daxuyaniya Hêzên Parastinê yên Îsraîlê (IDF) de ku doh hate weşandin, hat gotin ku “hêzên aşitiyê bi qesdî nehatine armanckirin, ji ber tevgerên gumanbar li herêma sînorî çend bombeyên dengî hatine avêtin.”
Herwiha hate diyarkirin ku têkiliyê bi UNIFIL’ê re hatiye danîn û hûrguliyên bûyerê ji aliyê din re hatine ragihandin.
UNIFILê ragihand ku yek ji bombeyên destan 20 metre dûrî personelên leşkerî yên Neteweyên Yekbûyî û wesayîtan, sê bombeyên din jî bi qasî 100 metre dûr ketine.
Her wiha hêza Demkî ya Neteweyên Yekbûyî li Lubnanê diyar kir ku hêzên Îsraîlê berê li ser karên rê çêkirinê yên li herêmê hatibû agahdarkirin, û bûyer li başûrê gundê Marwahinê, bi qasî yek kîlometre dûrî sînor qewimiye.”
Berdevkê Neteweyên Yekbûyî Stephane Dujarric, li ser pirsa ka Sekreterê Giştî Antonio Guterres daxuyaniya Îsraîlê ya ku hêzên aşitiyê bi qesdî nehatine armanckirin qebûl dike an na, wiha bersiv da:
“Ji niyeta Îsraîlê bêhtir, tişta girîng ew e ku hêzên Îsraîlê bi temamî li ser karên me yên vekirina rê li wê herêmê berê hatibû agahdarkirin.”
Ji ber şerê Îsraîl-Hizbullah li Lubnanê zêdetirî 4 hezar kesan jiyana xwe ji dest dan.
Di nav wan de bi sedan sivîl hebûn. Li gorî Banka Cîhanî, li welatê Rojhilata Navîn 11 milyar dolar zirar çêbû.
Ji aliyê din ve, li Îsraîlê 80 leşker û bi giştî 127 kes hatin kuştin.
