Ji fermandarên YJA Starê Zozan Çewlîk behsa têkoşîna Fermandara şehîd Emîne Erciyes kir.
Zozan Çewlîk diyar kir ku Emîne Erciyes weke çemekî bû ku ber bi şoreşa Kurdistanê ve diherikî û soza dilsoziya bi bîranîna wê dubare kir.
Her wiha Zozan Çewlîk got, Emîne Erciyes bi sekna xwe ya îdeolojîk, siyasî û tecrûbeyên xwe yên cidî yên li ser gerîlatiyê yek ji jinên şoreşger ên ji kesayetiyeke hevgirtî bû.
Ji fermandarên YJA Starê Zozan Çewlîk derbarê têkoşîn û xebata Endama Konseya Fermandariyê ya YJA Star û HPG’ê û Endama Fermandariya Biryargeha Navendî ya YJA Starê Emîne Erciyes axivî.
Zozan Çewlîk destpêkê Fermandara şehîd Emîne Erciyes bi hurmet, hezkirin û hesretê bi bîr anî û ji malbata wê ya hêja re sersaxiyê xwest.
”Sekna hevala Emîne ji bo me xetek e”
Zozan Çewlîk anî ziman ku Emîne Erciyes xwedî romantîzma gerîla ya Gulnaz Karataş bû ku yek ji sembolên têkoşîna azadiyê ya jinê bû û got:
Hevala Emîne di nava têkoşîna rastiya gelê Kurd de ne tenê li hemberî rewşa ku gelê Kurd û jinên Kurd di nav de ye, her wiha li hemberî rewşa ku gel û jinên Rojhilata Navîn di nav de ne jî têkoşiya.
Lewma kesayet û nasnameyeke sembol bû ku nasname, kesayetî, têkoşîn û dîroka azadiyê ya jinên Rojhilata Navîn diafirand.
Rizgariya gelan û hemû jinan di rizgariya gel û jinên Kurd de didît.
Sekna hevala Emîne sekna jin a azad e û ji bo me jî xetek e.
”Fermandar Emîne Erciyes di dema xwendina lîseyê de apoyî nas kir”
Zozan Çewlîk da zanîn ku heval Emîne di dema xwendina Lîseyê de Apoyî nas kir û wiha bi lêv kir:
Timî digot, piştî emrekî ez ê nebim a mêrekî, nebim a sîstemekê… Lê belê divê ya çi bim, bidim pey kîjan xeyalî, divê ez li ku derê xwe bibînim… Digot ku di vê mijarê de difikirî.
Hevala Emîne hemû kom dişopand, lê herî zêde ciwanên welatparêz şoreşger ên Apoyî, tevlîbûna wan, sekna wan bala wê dikişand.
Ji vir û pê ve meyla hevala Emîne ber bi nêrînên Apoyî û têkoşîna PKK’ê ve diçe.
Ev meyla xwe destpêkê di salên xwendina lîseyê de destpê dike.
”Fermandar Emîne mîna çemekî ber bi şoreşa Kurdistanê ve herikî”
Her wiha Zozan Çewlîk got, Hevala Emîne di 14’ê Hezîranê de bi komek ji hevalan di ser Yewnanistanê tevlî bû.
Piştre hevala Emîne di dawiya sala 1997’an derbasî qada Rêbertî, derbasî Akademiyê bû.
Min jî yekemcar hevala Emîne li wê zemînê nas kir.
Ji bo hevala Emîne qada Rêbertî gelekî girîng bû.
Hevala Emîne di gelek karî de bi wezîfe û berpirsyariyê rabû.
Ji Meclîsa PAJK’ê heta bi Rêveberiya KCK’ê, ji fermandariya Zagrosan heta bi endametiya Konseya Leşkerî ya HPG û YJA Starê tevlî gelek wezîfeyan bû.
Hevala Emîne mîna çemekî ber bi şoreşa Kurdistanê ve herikî.
Di dawiya axavtina xwe de Zozan Çewlîk anî ziman ku şehadeta hevala Emîne ne tenê ji bo hêzên me yên YJA Starê, ji bo tevahiya hêzên me yên giştî windahiyeke mezin bû û dibêje:
Em soza xwe ya dilsoziya bi bîranîna wê re dubare dikin.
