Serokkomarê Fransayê Emmanuel Macron piştî ku François Bayrou dengê baweriyê wernegirt û bi ser neket, Wezîrê Parastinê yê 39 salî Lecornu wekî serokwezîrê nû tayîn kir.
Li aliyê din di dema xwepêşandanên ‘Her Tiştî Rawestîne’ de, polîsên Fransî nêzîkî 200 kes binçav kirin.
Piştî hilweşîna hikûmeta François Bayrou, di dema xwepêşandanên ‘Her Tiştî Rawestîne’ yên ku hewl didin Fransa felç bikin, polîsên Fransî nêzîkî 200 kes binçav kirin.
Li ser wê yekê ku bi hezaran xwepêşander agir dadan, barîkat çêkirin û hewl dan ku riya dora Parîsê, ku yek ji otobanên herî qelebalix ên nav bajarên Ewropayê ye, bigirin, rayedaran 80 hezar polîs û cendermeyan peywirdar kirin.
Walîtî ragihand ku heta sibêha Çarşemê li herêma Parîsê 95 kes û li derveyî paytextê jî heşt kes hatine binçavkirin.
Li Porte de Montreuil a rojhilatê Parîsê, xwepêşanderan qutiyên çopê şewitandin û hewl dan rêyên tramvayê asteng bikin, lê polîsan astengî rakirin û girse belav kirin.
Her wiha xwepêşanderan ji bo astengkirina trafîkê ber bi otobanê ve jî meşiyan, lê bi heman awayî ji aliyê hêzên ewlehiyê ve hatin rawestandin.
Du sendîkayên mezin, CGT û SUD, piştgirî dan çalakiyên îro, di heman demê de ji bo 18’ê Îlonê grevên berfirehtir plan dikin.
Hikûmeta Bayrou ji bo kêmkirina kêmasiya giştî ya Fransa, di nav tedbîrên ku bûn sedema hêrsa berbelav de, pêşniyar kiribû ku du betlaneyên fermî bên rakirin.
Hin xwepêşander daxwaz kirin ku Macron Meclisa Neteweyî hilweşîne û bangek ji bo hilbijartinên pêşwext bike.
