Neteweyên Yekbûyî daneyek li ser windahiyên sivîlan li Ukraynayê parve kir.
Li gorî daneyan di sala 2025’an de li Ukraynê de windahiyên sivîlan ji sedî 40 zêde bûye.
Li gorî daneyên Mîsyona Çavdêriya Mafên Mirovan a Neteweyên Yekbûyî, di heşt mehên destpêkê yên sala 2025’an de, windahiyên sivîlan ên li Ukraynayê, li gorî heman heyama sala borî bi rêjeya ji sedî 40 zêde bûye.
Di rapora mîsyonê de hate diyarkirin ku îsal rêjeya mirinên sivîlan ji sedî 17 û hejmara birîndaran jî ji sedî 46 zêde bûye.
Bi taybetî di meha Tebaxê de, êrîşên ku ji hêla dronên kurt-menzîl ve hatine kirin, ji hemû cureyên çekan bêtir bûne sedema windahiyên sivîlan.
Di vê demê de 58 sivîlan jiyana xwe ji dest dane, 272 kes jî birîndar bûne.
NY: Ji sedî 72 windahiyên sivîl li herêmên donetsk û xersonê hatine tomarkirin
Li gorî daneyên Neteweyên Yekbûyî, nêzîkî ji sedî 72’ê windahiyên sivîlan li herêmên nêzî xeta eniyê, bi taybetî li Donetsk û Xersonê, hatine tomar kirin.
Her wiha, di sala 2025’an de karanîna mûşekên dirêj-menzîl û dronên kamîkaze jî bi awayekî berbiçav zêde bûye.
Piştî rawestandineke kurt a di meha Tebaxê de, di destpêka Îlonê de hate ragihandin ku Rûsyayê ji nû ve bi hejmareke rekor êrîşên mûşek û dronan pêk aniye.
NY: ji destpêka şer ve li Ukraynayê 14 hezar û 116 sivîl mirin
Seroka mîsyonê Danielle Bell ragihand ku di navbera 6-7’ê Îlonê de, Rûsyayê êrîşa xwe ya herî mezin li dijî Ukraynayê pêk aniye.
Di vê êrîşê de 810 dronên kamîkaze û 13 mûşekên bi hêz hatine bikaranîn, herî kêm pênc sivîl hatine kuştin û 41 kes birîndar bûne.
Her wiha di raporê de hate destnîşankirin ku di meha Tebaxê de êrîşên li ser binesaziya enerjiyê ya Ukraynayê jî zêde bûne.
Li gorî qeydên Neteweyên Yekbûyî, ji dema ku Rûsyayê di 24’ê Sibata 2022’yan de dest bi dagirkirinê kiriye, li Ukraynayê herî kêm 14 hezar û 116 sivîlan jiyana xwe ji dest dane, 36 hezar û 481 kes jî birîndar bûne.
Vance: Rûsya erdên ku hîna kontrol nekirine dixwaze
Yek ji astengiyên herî mezin ên li pêşiya danûstandinên aştiyê yên gengaz di navbera Ukrayna û Rûsyayê de, daxwazên Rûsyayê yên li ser erdê ne.
Têkîldarî vê mijarê Cîgirê Serokê Amerîkayê Vance axivî.
Vance wiha dibêje:
“Ez difikirim ku niha em gihîştine qonaxekê ku pirsgirêk li ser çend xalên bingehîn hatine kêmkirin.
Yek ji pirsgirêkan erd e. Rûs dixwazin nêzîkî 6 hezar kîlometre çargoşe erdên ku hêj bi hêza leşkerî bi dest nexistine, bi dest bixin.”
