Du rojên din salvegera şehadeta yek ji kadroyên pêşeng yên tevgera azadiya Kurdistanê Riza Altûn e.
Yek ji hevalên şehîd Riza Altûn yê têkoşînê Dûran Kalkan kesayet û têkoşîna wî nirxand.
Dûran Kalkan dibêje, Riza Altûn di pêşketina têkoşîna şoreşgerî, di mezinbûna tevgera Apocî û girseyîbûna wê de tevkariyên mezin kir û got, “Em ê têkoşîna pêkanîna armanc û xeyalên wan bidomînin.”
Kadroyê pêşeng yê Tevgera Azadiya Kurdistanê Riza Altûn 25’ê Îlona 2019’an di êrişa dewleta Tirk a dagirker de şehîd bû.
Bi boneya salvegera şehadeta wî yek ji hevalê wî yê têkoşînê Dûran Kalkan li ser kesayet û têkoşîna wî axivî.
Dûran Kalkan: Riza Altûn yek ji fermandarên destpêkê bû
Dûran Kalkan diyar kir Riza Altûn yek ji wan kesên destpêkê bû ku ji aliyê PKK’ê ve bi fermî weke fermandarê navendî yê PKK’ê hate erkdarkirin û got,
“Tevkarî li gelek perwerdeyên şervanan kir, li ser her kesî keda wî hebû.
Hevalê Riza her cure erk û berpirsyarî meşand. Endametiya komîteya navendî ya PKK’ê meşand, erka endametiya Konseya Rêveber a KCK’ê meşand.
Li çar parçeyên Kurdistanê û derveyî welat xebitî. Karên îdeolojîk, siyasî, dîplomatîk û civakî jî meşand.”
Dûran Kalkan: Riza Altûn di mezinbûna tevgera Apocî de tevkariyeke mezin kir”
Dûran Kalkan da zanîn ji Riza Altûn re şoreşgeriya yekpare tê gotin ku her tim afirand.
“Di pêşketina têkoşîna şoreşgerî, di mezinbûna tevgera Apocî û girseyîbûna wê de tevkariyên mezin kir. Kadro, şervan, gelê welatparêz û civak perwerde kir.
Hem berxwedêr, fermandar, leşker û şervanekî mezin bû, hem jî siyasetmedar, rêveberekî xurt, xebatkarekî bi bandor, milîtan û kesayetekî civakî bû.”
Dûran Kalkan: Riza Altûn her tişt bi ked û hewldanên xwe bi ser xist
Kalkan anî ziman şehîd Riza Altûn ev ev pêşketin hemû bi ked û hewldana xwe bi serxist û dibêje,
“Bi têkbirina zehmetiyan, rakirina astengiyan, bi têkoşîneke bi wêrek û fedakar bû. Danheviyeke gelekî mezin afirand.”
Dûran Kalkan: Şehadeta Riza Altûn windabûna daneheveke mezin bû
Kalkan diyar kir şehadeta Riza Altûn windabûna daneheveke girîng bû û got,
“Me ti carî şehadet weke windabûn nenirxandiye. Şehîd ne ew in ku winda bûne, şehîd ew in ku xwe pêk anîn e di warê hebûnî de. Ew in ku gihîştine serkeftinê, bûne şahidên şoreşê, şahidên serkeftinê û gihîştine azadiyê.
Di meşa azadiyê ya mezin de her tim wekî fermandar, wekî pêşeng wê rola xwe bilîzin.”
Dûran Kalkan: Heval riza her dem ji bo serketina sosyalîzma demokratîk têkoşiya
Kalkan da zanîn her çiqas şehîd Riza Altûn şervanê têkoşîna azadiya netewî yê Kurd bu jî lê di heman demê de şervanê sosyalîzmê yê kûr bû û got,
“Her dem ji bo serkeftina sosyalîzma demokratîk têkoşiya. Bi hişmendiya sosyalîst, xeta kesayetiya azad û civaka demokratîk gihand azadiya neteweyî.
Tevahiya jiyana xwe wekî mîlîtanê azadiyê yê hişmend dewam kir û bi encam kir.”
Dûran Kalkan di dawiyê de diyar kir ew ê di rêya rêberên daîmî de bimeşin, têkoşîna pêkanîna armanc û xeyalên wan bidomînin.
