Donald Trump têkîldarî şerê Rûsya û Ukraynayê axivî û got ji bo çareserkirina şer divê ew Putîn û Zelenskî binîn ba hev.
Li aliyê din jî Yekîtiya Ewroayê ji bo Ukraynayê bi qasî 2 mîlyar Euro razemeniya dronê kir.
Serokê Amerîkayê Donald Trump, li baregeha leşkerî ya Quantico ya eyaleta Virginia, têkîldarî rewşa şer a Rûsya û Ukraynayê axivî.
Donald Trump got weke ku difikîrîn şerê Rûsya û Ukraynayê ne bi hêsane û got:
“Wê demê tenê meseleyek me dimîne ku em çareser bikin, û divê em wê bi Putin û Zelenskiy re çareser bikin.”
Trump, bi teqezî got ku divê ew bi hev re bicivin û wiha got:
“Lê rêya tenê ya kirina vê yekê bi karanîna hêzê ye. Yanî, ger em qels bûna, wan ê heta bersiva banga min jî nedana.”
Di vê çarçoveyê de, Trump teqez kir ku Amerîka niha xwedî “hêzeke awarte” ye.
Trump, ji ber kaosa ku di dema vekişîna leşkerên Amerîkî ji Efxanistanê de qewimî, careke din rêveberiya Biden rexne kir û got ku ev yek Putin teşwîq kir ku êrişeke tam li Ukraynayê bike.
Di vê çarçoveyê de, Trump behsa daxuyaniya Medvedev a li ser çekên nukleer jî kir û got ku Medvedev gotiye botên nukleer ên Amerîkî “tenê ji bo tedbîrê” nêzî peravên Rûsyayê bûne.
Trump teqez kir ku Amerîka nikare destûrê bide ku kes “peyvê nukleer” bi kar bîne.
YE ji bo Ukraynayê 2 milyar euro razemeniya dronê kir
Li aliyê din seroka Komîsyona Ewropayê Ursula von der Leyen ragihand ku bi Ukraynayê re li ser hilberîna balafirên bê mirov bi nirxê 2 milyar euro li hev kirine.
Von der Leyen got:
“Ger em Ukraynayê wekî xeta parastinê ya yekem bibînin, divê em piştgiriya xwe ya leşkerî zêde bikin.
Ji ber vê yekê, me bi Ukraynayê re li hev kir. Ji bo hilberîna drone wê bi giştî 2 milyar euro bê xerckirin.
Ev yek dê rê bide Ukraynayê ku kapasîteya xwe berfireh bike û potansiyela xwe bi temamî bi kar bîne.
Di heman demê de Yekîtiya Ewropayê jî dê ji vê teknolojiyê sûd werbigire.”
Her wiha Von der Leyen teqez kir ku Ewropa divê “li hember êrişên balafirên bê mirov ên Rûsî yên li ser sînorên me, bersivek bihêz û hevpar bide.”
Seroka Komîsyona Yekîtiya Ewropayê ragihand ku di çarçoveya înîsiyatîfa “Eastern Flank Watch” de, ji bo avakirina “dîwarek drone” dê tedbîrên lezgîn bên girtin.
Kovara Financial Times di demeke nêz de ragihandibû ku piştî binpêkirina qada hewayî ya NATO’yê ji aliyê Rûsyayê ve, Yekîtiya Ewropayê amade ye ku bi milyarên euro bi teknolojiyên ku li Ukraynayê hatine ceribandin, “dîwarek drone” ava bike.
Komîserê Parastin û Fezayê yê Yekîtiya Ewropayê Andrius Kubilius jî gotibû ku ji ber tecrubeya Ukraynayê di xistina balafirên bê mirov ên Rûsî de, Ukrayna dê bi awayekî çalak di vê projeyê de cih bigire.
