Hêzên Ewlekariya Hundirîn da zanîn ku li Qamişlo, Reqa û Dêrazorê 8 gumanbar bi tawanên bazirganiya hişbirê û diziyê destgîr kirine.
Hêzên Ewlekariya Hundirîn da zanîn ku li Qamişloyê hêzên wan duh (22 Cotmeh) di serdegirtinekê de 3 gumanbar destgîr kirine û 245 gram heşîş û alavên ji bo bikaranîna madeyên hişbir ên pê re jî desteser kirine.
Li kantona Dêrezorê jî 2 gumanbar hatin destgîrkirin ku 840 gram mîsa krîstal û 1010 hebên Captagon pê re hebûn.
Li gorî daxuyaniyeke din a Hêzên Ewekariya Hundirîn, roja Sêşemê (21 Cotmeh) bûyereke diziyê di mala şêniyekî ya li bajarokê Hezîme yê Reqayê rû da.
Piştî lêkolîn û şopandina Hêzên Ewlakriya Hundirîn, 2 gumanbarên di kampa gundê El Hetaş de dimîninîn, hatin tespîtkirin û dûre jî hatin destgîrkirin. Di lêpirsînê de her du gumanbar li xwe mikur hatin ku diziya li malê wan kiriye.
20 milyon û 200 hezar lîreyê Sûriyeyê, hezar û 500 dolarê amerîkî û zêrên bi teşeya Quranê hatine çêkirin ên bi gumanbaran re hatin desteserkirin.
Her wiha îro li Qamişloyê kesekî ku bi motorsîklêta xwe çenteyên welatiyan didizîn, hate destgîrkirin û di mala wî de hejmareke çente û tiştên diziye hatin dîtin.
Hêzên Ewlekariya Hundirîn da zanîn ku kesên destgîrkirî ji Dozgeriya Giştî re hatine şandin.
