Li bajarê Minbicê ya di bin dagirkeriya dewleta Tirk û çeteyên wê de, sûc û binpêkirinên li dijî şêniyan dewam dikin.
Çek û madeyên hişbir jî bi awayekî zêde belav bûne.
Her wiha bajêr rasterast ji aliyê îstîxbarata Tirk ve tê birêvebirin.
8’ê Kanûna 2024’an ji dema dagirkeriya dewleta Tirk û çeteyê wê ji bajarê Minbicê re, sûc û binpêkirin, dewam dikin.
Di rojên destpêkê yên dagirkirinê de, çeteyên El Hemzat û El Emşat ên girêdayî dewleta Tirk a dagirker garaca Şaredariya Minbicê, talan kirin.
Çeteyên komên navborî kel û pelên saziyan, nexweşxaneya El Raîba, Nexweşxaneya El Furat (Niştimanî) û nexweşxaneya El Metahin talan kirin.
Di 23’ê Kanûna 2023’an de çeteyekî koma El Emşat êrişeke zayendî ji zarokeke 7 salî ya ji eşîra Bobenayê kir.
Li hemberî vê destdirêjiyê şer di navbera çete û eşîran de derket.
Di 26’ê Kanûna 2024’an de çeteyan hewl dan pompeyên avê yên stasyona gundê Ebû Kehef a navê dide 10 gundan, desteser bikin.
Gundiyan li hemberî wan sekinîn û rê nedan ku pombe werin desteserkirin.
Çeteyên El Hemzat, El Emşat û Silêman Şah dest bi talankirina malên şêniyan kirin û malbatên xwe li malên şêniyan, bi taybet ên Kurd ku bi gefa kuştin û revandinê hatine koçberkirin, bi cih kirin.
Li gorî raporan, ji sedî 70 niştecihên resen ên Minbicê koçber bûne.
Îstîxbarata Tirk bajarê Minbicê bi rêve dibe
26’ê Çileya 2025’an hatibû îdiakirin ku hêzên hikumeta veguhêz a Sûriyê derbasî bajarê Minbicê bûne û 3 navnd; Polîs, Ewlehiya Sûc, Ewlehiya Giştî ava kirine.
Her wiha şaxekî îstîxbaratê li çargoşeya ewlehiyê ya navenda bajar heye ku rasterast ji aliyê îstîxbarata Tirk ve tê birêvebirin.
Bajar jî bi temamî hîna di bin dagirkeriya dewleta Tirk û çeteyên wê de ye.
Li çargoşeya ewlehiyê girtîgheke kevin heye ku ji 5 hucreyên tê de hatine ragirtin.
Beşek ji girtiyan jî sewqî girtîgehên Cerablus, Bab, Raî û Hewar Kils tên kirin.
Her wiha li Minbicê ji dema dagirkirinê ve gelek teqîn çêbûne.
Teqîna herî dijwar di 3’ê Sibata îsal de pêk hat.
Di vê teqînê de erebeyeke veguhestina jinên karker li nêzî çerxerêya El Metahin hat hedefkirin. Di encamê de 25 jinên karker şehîd bûn.
Madeyên hişbir li Minbicê belav bûne
Ji dema dagirkirinê ve, madeyên hişbir û çete bi awayekî mezin li Minbicê belav bûne û baziganiya wan tên kirin.
Li gorî agahiyan, çekek kalaşînkof bi 300 dolarî tê firotin.
Di saetên şevê de jî ji tirsa dizî û revandinê kolan vala ne.
Navenda Çavdêriya Mafên Mirovan a Sûriyeyê (SOHR), demek berê ragihandibû ku çeteyekî li sûka bajar bi çekê bi ser dikanekê de girtibû.
