Sewalên Şedadê ji ber hişkesalî û bihabûna êm, rûbirûyî gefan in.
Sewalvanên bajarê Şedadê û gundewarê wê dan zanîn ku hişkesalî û buhabûna êm, bandor li bihayên sewalan jî kiriye û gotin:
”Ji bo peydakirina êm ew neçar bûn ku hin sewalên xwe bifiroşin û got ku ev yek gefê li sewalvaniya li herêmê mayî dixwe”.
Li bajarê Şedadê û gundewarê wî pêleke hişkesaliyê ya xurt heye.
Di encamê de bandor li sewalvanan û jiyana wan a rojane kiriye.
Ji ber kêmbûna baranê bihayê êm zêde bû û barê sewalvanan giran kir û gefan li vê beşa girîng a ku bi hezaran şênî di dabînkirina qûta xwe ya rojane de pişta xwe didinê, dixwe.
Sewalvan Ebdulmecîd El Ehmed got ku hişkesalî û zêdebûna bihayê êm hişt şiyana hilberîna wan kêm bibe.
Sewalvanên Şedadê: Tevgera kirîn û firotinê lewaz e
El Ehmed diyar kir ku her kîloyek kayê gihîşt 2 hezar lîreyan. Kîloyê tovê êm jî gihîşt 4 hezar lîreyan û got:
Vê bihabûnê hişt ku gelek sewalvan neçar bibin qîsmekî ji pezê xwe bifiroşin, ku êm ji beşa mayî re peyda bikin.
Hin sewalvanan beşek mezin ji pezên xwe ji ber kêmbûna êm û bilindbûna lêçûnên lênêrîna rojane ji dest dane.
Dibe ku hejmara sewalên li herêmê di çend mehên bê de bi awayekî berbiçav kêm bibe.
”Bihayên sewalan bi awayekî nisbî sabit e lê tevgera kirîn û firotinê lewaz e”
Bazirganê sûka Hedadiyê Cemal El Selûh der barê tevgera sûka sewalan de axivî û wiha bi lêv kir:
Nirxên pez bi awayekî nisbî sabit e, lê tevgera kirîn û firtonê pir lewaz e. Her mihek ji 2.5 heta 3 mîlyon lîreyan e û yê beranan ji 2.5 heta 4 mîlyonan e. Berx jî ji 1.5 heta 2 mîlyonan e.
El Selûh diyar kir ku bilindbûna bihayên êmê û hişkesaliya berdewam hişt ku lêçûna rojane ya xwedîkirina her sewalekî bigihîje 10 hezar heta 15 hezar lîreyan û ev jî barê sewalvanan giran dike.
Girêdayî heman mijarê, bazirgan Riyad El Ebdullah diyar kir ku ji ber şert û mercên zehmet tevgera kirîn û firotinê gelekî lewaz bûye û got:
Sedema vê tevgera lawaz ew e ku lêçûna xwedîkirinê bilind bûye û şênî ji ber rewşa aborî nikarin bikirin.
Sewalvanên Şedadê: Pêwîstî bi destwerdan û piştgiriyê heye
Sewalvanên Şedadê dibêjin, êdî rewş nayê tehemûlkirin û destwerdana aliyên eleqedar ê pêwîstiyeke ku êm bi bihayek guncaw were peydakirin, li hember hişkesaliyê weke kolandina bîran, çareserî bên peydakirin.
