Li gundewarê Dêrazorê di operasyona Hêzên Ewlekariya Hundirîn de 3 DAIŞ’î hatin destgîrkirin.
Di daxuyaniyê de hate diyarkirin ku Hêzên Têkoşîna li dijî Terorê (HAT) û Dezgeha Ewlehiya Giştî bi desteka Hêzên Ewlekariya Hundirîn berbanga 6’ê Mijdarê operasyoneke bi bandor li gundewarê bakurê Dêrazorê li dijî şaneyeke çeteyên DAIŞ’ê li dar xist.
Di daxuyaniyê de hate destnîşankirin ku operasyon piştî şopandina tevgera endamên şaneyê hate destpêkirin û ev agahî hatin parvekirin “Operasyon di çarçoveya hewldanên domdar ên têkbirina şaneyên rêxistinî û zuhakirina jêderên terorê li herêmê de pêk hat. Hêzên me piştî şopandineke bi baldar a tevgerên şaneya terorîst, bi ser cihên wan de girt û bêyî ku zerar li endamên me were cihên şaneyê kontrol kir.”
Di daxuyaniyê de hate ragihand ku di operasyonê de 3 çeteyên şaneyên DAIŞ’ê hatin destgîrkirin û miqdarek çek, belge, alavên peywendiyan hatine desteserkirin.
Hêzên ewlekariyê diyar kir ku wan dest bi lêkolînan kirine, piştre dê kesên destgîrkirî sewqî dozgeriyê bike.
