Li Efrîna dagirkirî sûc û hovîtiya dewleta Tirk û çeteyên wê sînoran nas nake.
Di nava çar rojan de 3 Kurd li Efrîna dagirkirî hatin kuştin.
Çeteyên dewleta Tikrk a dagirker 5’ê Mijdarê Şukrî Ehmed Oso yê 65 salî, 7’ê Mijdarê Mihemed Ehmed Derwîş yê 55 salî û îro jî Mistefa Mihemed Îso bi hovane kuştin.
Li herêmên Bakur û Rojhilatê Sûriyê yên ku dewleta Tirk û çeteyên wê dagirkirine sûc û hovîtî sînoran nas nake.
Kuştin, revandin, talan, dizî û guhertina demografiyê li van herêman bê navber dewam dike.
Yek ji wan herêmên ku di van rojên dawiyê de sûcên li dijî mirovahiyê lê zêde buye, Efrîna dagirkirî ye.
Li Efrînê ku ji sala 2018’an ve di bin dagirkeriya Tirkiyê û çeteyên wê de ye di nava 7 salan de bi sedan welatiyên Kurd hatin revandin û ji wan bi dehan kes hatin kuştin.
Dîsa çeteyan di berdêla berdana kesên ku revandin de bi deh hezaran dolar fîdye ji malbatên wan xwestin.
Ne tenê revandin û kuştin, deverên dîrokî hatin hilweşandin û xwezaya wê û darên zeytûnan hate talankirin.
Di nava çar rojan de 3 Kurd li Efrîna dagirkirî hatin kuştin
Çeteyan îro îmzeya xwe danîn bin hovîtiyeke din û welatiyekî Kurd yê din hate kuştin.
Li gorî nûçeya ANHA’yê çeteyên dewleta Tirk a dagirker welatiyê bi navê Mistefa Mihemed Îso (Îskê) yê ji gundê Qermitliq bi hovane kuştin.
Hate diyarkirin çeteyekî Mistefa Mihemed bire gundê Senarê li nava zeviya zeytûnan, paşê jî li serî wî da û ew kuşt.
Her wiha cenazeyê wî jî li heman cihî defin kir.
5’ê Mijdarê jî çeteyên dewleta Tirk welatiyê bi navê Şukrî Ehmed Oso yê 65 salî ku weke navê Bavê Ebdo tê naskirin kuştin.
Şukrî Ehmed Oso ku ji gundê Keferzîtê bû, dema bi trektora xwe ji kargeha guvaştina zeytûnan vedigeriya li ser rêya gundên Firêriyê-Kefezîtay ji aliyê çeteyan ve hat gulebarankirin û jiyana xwe ji dest da.
7’ê Mijdarê jî Mihemed Ehmed Derwîş yê 55 salî di encama êrişa çeteyan de hat kuştin.
Mihemed Ehmed Derwîş yê ji gundê Birc Ebdalo yê bi ser navçeya Şêrawa dema ew û hevjîna xwe li bexçeyên xwe bûn di encama gulebarana çeteyan de jiyana xwe ji dest da.
