HRE’yê şehadeta şervanê xwe Simko Dilpak ê ji xelkê Başûrê Kurdistanê ye ragihand û got: “Bi tîpên zêrîn nav xwe di Berxwedana Serdemê de neqişand.”
Hêzên Rizgariya Efrînê (HRE) bi daxuyaniyekê şehadeta şervanekî xwe ragihand.
Daxuyanî wiha ye:
’’Em hevrêyê xwe Simko Dilpak (Diyarî Ehmed Hewla) ku di 13’ê Mijdara 2024’an de di encama êrişa balafira bêmirov ya biçek a dewleta Tirk a dagirker de gihişt asta şehadetê bi rêzdarî bi bîr tînin. Şervanê dilsoz Simko Dilpak; xwediyê keda salan di nava dilê çiyayên kurmênc de bû. Bi xwîna xwe ya zelal destana serdemê di qonaxa duyemîn de nivîsand. Bi cesaret û dilsozî, her kêlî ji jiyana xwe ji bo pêkanîna xeyalên hevrêyên xwe yên di oxira Efrîneke azad û serfiraz de xwe feda kirin, têkoşiya û bi ser bilindî gihişt pîroziya şehadetê. Em ji malbata hêja ya hevrê Simko Dilpak û ji tevahiya gelê xwe yê Kurdistanê re sersaxiyê dixwazin û soza tolhildana hevrêyê xwe û berdewamkirina rêyan wan nû dikin.
Hevrê Simko Dilpak di sala 2001’an de li navenda berxwedanê navçeya Qendîlê ya li Başûrê Kurdistanê di nava malbateke welatparêz de jidayik dibe. Hevrê Simko ji temenê zarokatiya xwe ve bi hestên xwe yên ji dil dibe aşiq û evîndarê welatê xwe û ji nêz ve berxwedana Rojavayê Kurdistanê û Çiyayên azad dişopîne û her roj hestên wî yên welatparêziyê mezintir û bilindtir dibin. Hevrê simko hestên xwe dixe piratîk û berê xwe dide Rojavayê kurdistanê da ku li kêleka zarokên welatê xwe têkoşîna azadiya gelan bide meşandin. Li Rojavayê Kurdistanê dest bi nivîsandina çîroka lehengiya xwe dike. Hevrê Simko ji bo ku çand, dîrok û hebûna xwe bêtir nas bike û bibe bersiv ji dijminên xakê re, di perwerde û akademiyên bîrdozî û leşkerî re derbas dibe. Bi demê re xwe di her warî de bi pêş dixe û xwe dighîne asta fermandarê şer. Her wiha li hemû bajar û herêmên Rojavayê Kurdistanê kar û xebata xwe dide meşandin. Li her deverê navê xwe dineqişîne û di dile xelkên Rojava de cihekî xwe ava dike.
Hevrê Simko bi doza mafdar a gelê Efrînê bandor dibe û ji bo ku wek ewladekî Kurdistanê cihê xwe di têkoşîna rizgariya herêma Efrînê de bigire, berê xwe dide nava refên hêzên me Hêzên Rizgariya Efrînê. Bi baweriyeke mezin di çeperên rûmetê de mil bi mil li kêleka hevrê û hogirên xwe, ji bo parastina gelê xwe ji êrişên wehşî û hovane yên dagirkeran cihê xwe di nava refên me de digire. Di nava şervanên Hêzên Rizgariya Efrînê de hevrê Simko Dilpak bi cesaret, hevaltiya xwe ya rast, welatperwerî û dilnizmiya xwe tê nasîn. Di berxwedana dîrokî ya Efrînê de navê xwe bi tîpên zêrîn di pirtûka destana serdemê de dineqişîne. Heya kêliya xwe ya dawî bi baweriya rizgariya xaka Efrînê tevdigeriya û di oxira pêkanîna van armancan de xwe kir mertal ji gel û welatê xwe re.
Dijminên Kurdan her çendî xwestin Kurdistana mezin parçe bikin û bi her şêweyî hewldan gelê Kurd ji hev bidin qut kirin, lê belê bi saya fedakariyên hevrêyên şehîd mîna Simko û bi hezaran fedayiyên Kurdistanê, planên dijminan hatin têkbirin. Keç û xortên Kurdistanê li ser axa welatê xwe li çar parçeyan xwîna xwe rijandin û bi van fedakariyan îsbat kirin ku Kurd û Kurdistan yek e tu carî nabin parçe.
Di serî de ji malbata hêja ya hevrê Simko Dilpak re, ji gelê me yê welatparêz û bi taybet ji gelê me yê Qendîlê û Başûrê Kurdistanê re em sersaxiyê dixwazin. Em weke hevreyên wî soza tolhildan û pêkanîna xeyalên hevrêyên xwe yên şehîd nû dikin. Ji bo Efrîneke azad û serferaz û ji bo vegereke bi rûmet em ê tekoşîna pîroz li hemberî dagirkerî û mêtîngeriyê ji her demê bêhtir bilindtir bikin. Aramiya gelê me xeta me ya sor e. Em ê di çarçoveya parastina rewa de li hemberî hemû metirsiyan bibin bersiv û em ê layiqî ked û fedakariyên hevrêyên xwe yên şehîd bin.”
Nasnameya şehîd wiha ye:
Nasnav : Simko Dilpak
Nav û Paşnav : Diyarî Ehmed Hewla
Navê Dayikê : Xedîce
Navê Bav : Ehmed
Cih û Dîroka Şehadetê : 13’ê Mijdarê 2024 , Qonaxa Duyemîn ya Berxwedana Serdemê
