Wezareta Parastinê ya Rûsyayê ragihand ku wan herêma Ivanopolyeyê ya li Donetskê kontrol kirine.
Di daxuyaniya wezaretê de hate gotin ku Hêzên Çekdar ên Rûsyayê li Ukraynayê operasyonên xwe didomînin.
Di daxuyaniyê de hate destnîşankirin ku Kîevê li ser axa Rûsyayê êrîşên “terorê” li dijî sivîlan pêk anîne û wek bersiv, artêşa Rûsî bi tundî li ser pîşesaziya leşkerî û binesaziya enerjî ya Ukraynayê xistiye.
Hate gotin ku êrîş bi moşekên hipersonîk “Kinjal” ên di nav de, bi çekên dûr-menzîl, bi rastbîniya bilind ên ji bejahî, deryayê û hewayê û bi balafirên bêmirov hatiye kirin.
Di daxuyaniyê de hate ragihandin ku yekîneke li herêma Donetskê ketiye destê artêşa Rûsî û wiha hate gotin:
“Hêzên tîma leşkerî ya Başûr, bi çalakiyên biryardar, herêma Ivanopolyeyê yê Komara Gel a Donetskê rizgar kirin.”
Wezareta Parastinê ya Rûsyayê duh jî ragihandibû ku yekîneya Zatişye ya li herêma Zaporijyayê kontrol kirine.
Zelensky: Rûsya li Ukraynayê bi 22 moşek û zêdetirî 460 dronan êrîş kir
Her wiha hêzên Rûsî di 25’ê Mijdarê de li dijî Ukraynayê 22 moşekên cureyên cuda û zêdetirî 460 balafirên bêmirov bi kar anîn.
Li bajêr gelek avahiyên niştecîh û binesaziya sivîl zirar dît. Heta niha 6 mirî û 13 birîndar hatin ragihandin.
Karê lêgerîn û rizgarkirinê li qadên êrîşê didome.
Zelenskî diyar kir ku li herêma Odesayê jî wêraniyeke mezin heye û bal kişand ku artêşa Rûsî bender, embarên xwarinê û binesaziya ku tu girîngiya leşkerî tune ye kirine armanc.
Li gel vê yekê artêşa Rûsî li herêmên Dnîpro, Xarkîv, Çernîhîv û Çerkasî jî êrîş pêk anîne.
Zelenskî diyar kir ku armanca sereke ya êrîşan binesaziya enerjî û hemû pergalên ku jiyana rojane ya gel peyda dikin e.
Zelenskî derbarê cebilxaneya hatiye bikaranîn de ev agahî parve kir:
“22 moşek, di nav de moşekên balîstîk jî hene. Zêdetirî 460 balafirên bê mirov, piraniya wan ‘Şahed’ ên çêkirina Rûs-Îranê ne.”
Zelenskî got ev rewş careke din giringiya piştevaniya rojane ya hemû hevkarên Ukraynayê bi bîr tîne û wiha berdewam kir:
“Çek û pergalên parastina hewayî jiyanî ne. Bi heman awayî divê zexta cezayên li ser Rûsyayê dewam bike.
Pêwîst e hemû hevkar bi hev re ber bi dîplomasiyê ve biçin. Zexta li ser Rûsyayê bêguman wê encam bide.”
Li gorî agahiyan di encama êrîşa giran a li Kîevê de 6 kes jiyana xwe ji dest dan, 13 kes birîndar bûn; 18 kes ji bin kavilan saxderxistin, ji 57 kesan re piştgiriya psîkolojîk hate dayîn.
