Îsraîl bi awayekî fermî Somalîland nas kir, ku sala 1990’î ji Somaliyê veqetiyabû.
Bi vî rengî, Îsraîl bû yekemîn welat ku Somalîland nas kir.
Tirkiye jî di nav de, gelek welatan nerazîbûn nîşanî vê gava Îsraîlê dan.
Somalîland ku piraniya wê misilman e, sala 1990’î ji Somaliyê veqetiya û bi awayekî xweser xwe bi rêve dibir. Lê heta niha ji aliyê tu dewletekê ve nedihat naskirin.
Piştî 35 salan Îsraîl bû dewleta yekem ku ev welat nas kir.
http://doc.afp.com/893F7T3
Îsraîlê duh ragihan ku ew bi awayekî fermî Somalîlandê weke dewleteke serbixwe nas dikin û ew ê balyozxaneya xwe jî li wir vekin.
Serokwezîrê Îsraîlê Binyamîn Netenyahû eşkere kir ku wî û Serokê Somalîlandê Ebdurehman Mihemed Ebdullah ji bo fermîkirina vê yekê danezaneke hevpar îmzekirine.
Netanyahû diyar kir ev danezana hevpar xwedî ruhê Peymanên Îbrahîmî ye. Her wiha da zanîn wî ji bo serdaneke fermî Serokê Somalîlandê vexwendiye Îsraîlê û ew ê di mijarên çandinî, tenduristî, aborî û teknolojîk de hevkariyê pêş bixin.
Tirkiyê û gelek welatan nerazîbûn nîşanî vê gava Îsraîlê dan
Di serî de, Somalê û Tirkiyê gelek welatan bertek nîşanî vê gava Îsraîlê dan.
Hikumeta Somalî ev gava Îsraîlê şermezar kir û weke êrişeke der-qanûnî ya li dijî serweriya welat bi nav kir. Her wiha diyar kir Somalîland beşek ji xaka Somaliyê ye.
Wezareta Karên Derve ya Tirkiyê ragihand ev gava Îsraîlê destwerdaneke li nava kar û barên naxweyî yên Somalîyê ye. Her wiha diyar kir Tirkiye wê piştgiriya xwe ya bi Somaliyê re bidomîne.
Baregeheke leşkerî ya Tirkiyê li Somaliye heye û perwerdeye leşkerî dide artêşa wî welatî. Her wiha xebatên lêgerîna xaz û petrolê jî dimeşîne.
Wezîrê Karên Derve yê Misirê Bedir Ebdulatî jî derbarê mijarê de bi hempîşeyên xwe yên Somalî, Tirkiye û Cîbûtî re hevdîtina bi telefonê kir.
Sekreterê Komkara Erebî Ehmed Ebû Xêd jî diyar kir ev gava Îsraîlê binpêkirina hiqûqa navnetewî û tune hesibandina rêgeza serxwebûna dewletan û yekbûna xaka wan e.
Yekîtiya Efrîkayê jî ku nûnertiya 55 welatan dike, derbarê yekîtî, serwerî û yekbûna xaka Somaliye de hişyarî da ku wê her hewldaneke li dijî vê yekê, rê li ber encamên giran veke.
