Rêjeya ava binerd li hinek herêmên Rojava ji berê baştir bûye. Av li Himê 28 cm, li Til Temirê ava bîran 3 m, li Dirbêsiyê 2 m, gundê Kerbetilî 3 m û Amûdê 3,7 m bilind bûye. Bilinbûna rêjeya avê bandoreke erênî li jîngeh û çandiniyê dike.
Li gorî berpirsê beşa teknîk a Daîreya Avê ya Hesekê Aldar Yûsiv bilindbûna rêjeya avê ya bîran gelekî girîng e û bandoreke erênî li ser ekolojî, mirov û çandiniyê dike.
Aldar Yûsiv anî ziman ku di dema borî de Daîreya Avê ya Hesekê gelek tecrube li ser bîrên avê çêkirine da ku avê kêm ji binê erdê derxin û encam erênî bû. Rêjeya ava binerd bilind bûye û niha dixebitin ku li gorî gurbûna avê pompên avê bi taybet li herêma Şemûka û Nefaşa deynin da ku ava binerd têra demeke dirêj bike.
Yûsiv diyar kir ku ew hewl didin cotkar avê kêm bidin bikaranîn û wiha got: “Ji ber yên herî zêde avê bikar tînin, cotkarin. Li malan avê bi qasî cotkaran nadin bikar anîn. Divê cotkar bi teknîkên nûjen avdaniyê bikin. Mînak zeviyên xwe bi dilop û reşandinê, av bidin, da ku av zêde neçe.”
Li gorî nîşaneyên qeydkirî Yûsiv got: “Di belgeyên 2025-2026`an de diyar bû ku rêjeya avê li gelek herêman zêde bûye. Li herêma Himê ya Hesekê av 28 cm zêde bûye, li Til Temir jî ava bîran 3m bilind bûye, bîrên ser erd 65 cm bilind bûye, li Dirbêsiyê bîrên Sorsork 2 m, gundê Kerbetilî yê Dirbêsiyê 3 m, li Amûdê jî 3,7 m rêjeya avê bilind bûye.”
Yûsiv her wiha anî ziman ku ji bo bîrên ser erdê di siberojê de projeyên wan nîn in û wiha got: “Ji ber herêm ava xwe ji çavkaniyên derveyî Sûriyeyê digirin û bi taybet ji Tirkiyê digirin. Berê herêmê pêdiviya xwe ya avê ji bîrên Xabûr ku hejmara wan 116 bîr bûn û li herêma Serêkaniyê, Cerceb û Sefeh bûn. Her wiha bîr li Elok jî hebûn. Rewşa avê li herêmê bi baranê ve girêdaî ye. Eger baran bibarê av dikeve bîran û pêdiviya herêmê tê pêşwazî kirin, eger baran jî neyê erd ziwa dibin û dibe çol.”
