Rêveberiya Kar û Barên Sivîl a Helebê ragihand ku hevdîtinên ji bo welatiyên Kurd ên neqeydkirî dê di 28`ê Hezîranê de dest pê bikin.
Rêveberiya Kar û Barên Sivîl a Helebê ragihand ku navên koma yekem a Kurdên neqeydkirî ji bo hevdîtinê derketin. Rêveberiyê diyar kir ku hevdîtin dê di 28’ê Hezîranê de dest pê bikin.
Rêveberiyê diyar kir ku hevdîtin dê li Ofîsa Qeyda Sivîl a Çaremîn a Helebê li nêzî Otela Sheraton, werin pêkanîn. Her wiha da zanîn ku ji her malbatekê dem hatiye destnîşankirin û hat xwest ku hemû endamên malbatê amade bin da ku kar û barên wan temam bikin.
Der barê mijarê de şaredara Kobanê Elmaz Romî diyar kir ku xebata li ser biryarnameya 13`an nêzîkî 2 meh berê dest pê kiriye û kar û barên ji bo qeydkirina welatiyên neqeydkirî, hatine destpêkirin da ku serlêdanên hemwelatîbûna Sûriyeyê ji bo welatiyên Kurd ên neqeydkirî were dayîn.
Elmazê her wiha got di dema borî de nêzîkî 400 malbatên ji bajarê Kobanê navên xwe bi rêya Şaredariya Gel tomar kirine û piştî temamkirina pêvajoya destpêkê, dosyayên wan ji bo şopandina qanûnî ji parêzgeha Helebê re hatine şandin.
