Li Iraqê 33 bi Vîrûsê ketin

Vîrûsa corona ya metirsîdar hîna jî li welatên herêmê û cîran belav dibe.

Li Hewlêrê tevî rewşa qedexeya derketina derve, 22 kesên din bi vîrûsê ketin.

Her wiha li Îranê jî di nav bîlançoya giran a kesên ku bi vîrûsê dikevin de, xebatkarên çapemeniyê jî hene.

Li Iraqê ku ji bo pêşîgirtina li belavbûna vîrûsa Corona gelek tedbîr hatine girtin jî , hîna vîrûs belav dibe.

Li gorî daxuyaniya Wezareta Tenduristiya Iraqê di nava 24 saetên borî de 33 kes li Iraqê bi vîrûsê ketine.

Ji wan 22 kes li Herêma Başûrê Kurdistanê ne.

Hate gotin di nava vê demê de 3 kesên bi vîrûsê ketine jiyana xwe ji dest dane û 5 kes jî başbûne.

Heta niha bi giştî li Iraqê 266 kes bi vîrûsê ketine, 23 kes mirine û 62 kes jî baş bûne.

Seroka Parlementoya Başûrê Kurdistanê: Girêdayî biryarên pêşîgirtina Vîrûsa Coronayê bin

Seroka parlamentoya Herêma başûrê Kuristanê bang li Hikumeta Herêmê kir ku mekanîzmayek lezgîn ji bo belavkirina mûçeyê karmenda bibîne.

Her wiha bang li hemû kesê jî kir ku girêdayî biryarên ji bo pêşîgirtina belavbûna coronayê bin.

Li Tirkiyê bîlanço her ku diçe giran dibe

Li Tirkiyê ku ku jimarên rast ên derbarê vîrûsê de nayên dayîn, bîlanço her ku diçe giran dibe.

Desthilata Tirkiyê ragihand ku 9 kesên din bi vîrûsê mirine.

Bi vî awayî hejmara kesên li Tirkiyeyê heya niha mirine, gihîşt 30 kesan.

Her wiha jimara kesên bi vîrûse ketine bi giştî hezar û 236 kesin.

Desthilatdarî bi desteserkirina şaredariyên HDP’ê û binçavkirina Kurdan li pêşiya têkoşîna li dijî vîrûsê dibe asteng.

HDP: AKP’ê, ji bo “Corona” tiştê pêwîst nekir

Komîsyona Polîtîkayên Civakî û Tenduristiyê ya HDP’ê diyar kir ku AKP’ê di têkoşîna li dijî vîrûsa Coronayê de tişta pêwîst nekir, nekarî tevdîran bigire û dereng ma.

“Ji Bo hemû girtî bên berdan, divê her kes seferber bibe”

Federasyona Komeleyên Piştevanî û Hiqûqî ya Girtiyan a MED ji ber metirsiya vîrûsa korona ya li ser girtiyan, banga seferberiyê ji bo serbest berdana girtiyan kir.

Li Îranê 127 kesên din bi Vîrûsê ketin

Bîlançoya vîrûsa corona li Îranê jî giran dibe..

Li gorî Wezareta Tenduristiyê ya Îranê di nava 24 saetên borî de 127 kesên bi vîrûsê mirin.

Bi vê re heya niha li Îranê hezar û 812 kesan jiyana xwe ji dest dane.

Her wiha îro hezar û 411 kesên din jî bi vîrûsê ketine.

Bi vê re jimara giştî ya kesên bi coronayê ketine, gihîşt 23 hezar û 49 kesî.

Li Îranê 20 Xebatkarên çapemeniyê jî bi Corona ketin

Li Îranê xebatkarên çapemeniyê jî corona xilas nebûn.

Hat raghandin ku li Îranê 19 nûçegihan û kamermanan bi vîrûsê ketine.

Ji Ajansa Îranî Faris xebatkarekî jiyana xwe ji dest da.

Her wiha hat raghandin ku pêşkêşvanan nûçeyan a herî navdar li Iranê Atîfe Mîr Sîdî jî bi vîrûsê ketiye.

Back to top button