Corona li beşên din ên Kurdistan û welatên cîran hîna bi bandore.Li Başûrê Kurdistanê gelek rewşên nû hatin tomarkirin.
Li Amed a bakurê Kurdistanê jî gelek kargehan ragihand ew deriyên xwe ji bo xebatkarên tendurisiyê ku nikarin biçin malên xwe, vedikin.
Vîrûsa Corona bandor û belavbûna xwe li beşên din ên Kurdistanê û welatên herêmê jî didomîne.
Li gorî daxuyaniyê wezareta tenduristiyê ya Herêma Başûrê Kurdistanê 11 kes ku ji wan 3 zarok, 2 jin û 5 mêr in, bi vîrûsê ketine.
Ji wan 7 kes li Silêmaniyê, kesek li Derbendîxan û 3 kes li Helebceyê ne.
Her sê kesên ku li Helebce bi vîrûsê ketine zarok in.
Her wiha 3 kesên din jî li Hewlêrê bi vîrûsê ketine û yek ji wan zarok e.
Bi giştî heta niha li Herêma Başûrê Kurdistanê 204 kes bi vîrûsê ketin, 2 kes mirine û 62 kes jî rihet bûne.
Jinên Şengalê ji bo parastina ji Coronayê, mask belav kirin
Li Şengalê jî girtina tedbîrên li dijî pêşîlêgirtina vîrûsê dewam dikin.
Di vê çarçoveyê de Tevna Alîkariya Jinên Êzidî, mask li endamên asayîşê, dikandar, xebatkarên şaredariyê û gel belav kirin.
Li Tirkiyê zêdetirî 18 hezar kes bi vîrûsê ketine
Li Tirkiyê her roja ku diçe bîlançoyek zêdetir tê raghandin.
Li gorî daneyên desthilatdariyê, li Tirkiyeyê heta niha 18 hezar û 135 kes bi vîrûsê ketine, 356 kes jî mirine.
Rêxistinên tendurisiyê jî dibêjin jimara rasteqîn ji vê zêdetir e.
Li Amedê 140 kesên ku bi vîrûsê ketine, tên dermankirin
Li Amedê hejmara kesên ji ber vîrûsê ku li nexweşxaneyan tên dermankirin, her roja diçe zêdetir dibe.
Li bajêr heya niha testa 59 kesan pozîtîf derketiye û bi giştî 140 kes ji ber şewbê tên dermankirin.
Li Amedê piştevaniya bi xebatkarên tenduristiyê re fireh dibe
Bi belavbûna vîrûsa corona re pirsgirêkên pê ve girêdayî jî zêde dibin.
Li gorî daneyên dawî 601 xebatkarên tenduristiyê bi vîrûsa koronayê ketine.
Xebatkarên tenduristiyê ku bi gumana vîrûsa koronayê li wan jî geriyaye naçin malên xwe.
Li Amedê gelek kargehan ragihand ku ew deriyên xwe ji bo xebatkarên tenduristiyê vedikin.
Omer Ocalan: Îmralî, di metirsiyê de ye
Parlamenterê HDP’ê yê Rihayê Omer Ocalan diyar kir ku Hikûmeta Erdogan li bakurê Kurdistanê ti tedbîran ji bo Coronayê nagire û xelkê Bakur bi vîrûsê re rû bi rû mane..
Omer Ocalan bang li CPT jî kir ku ji bo rewşa girtîgehan û xeteriya Coroanyê li ser wan bikeve tevgerê..
HRW: Girtiyên Tirkiyê di xeteriyê de ne
Rêxistina Human Rights Watch (HRW) ragihand ku ji ber belavbûna vîrûsa corona girtiyên li Tirkiyê di xeteriyê de ne.
Rêxistinê bang li desthilatdariya Tirkiyê kir ku girtiyên ku li gorî qanûnên terorê girtî ne jî, di nav pilanên wan ên nû yên ji bo serbestdana girtiyan de cih bigrin.
Bîlançoya li Îranê hîn jî giran dibe
Li Îran a ku hîn ji ber belavbûna vîrûsê pişt lê hatiye şikenandin, 134 kesên din ji ber vîrûsê mirin û hezar û 715 kesên din pê ketin.
Heta niha bi giştî li Îranê 3 hezar û 294 kes mirine, 53 hezar û 183 kes pê ketine.
17 hezar û 935 kes jî rihet bûne.
