Berdevka Meclîsa Jinan a HDP’ê Ayşe Acar Başaran bal kişand ser bandora şewba vîrûsa koronayê li Tirkiyê û destnîşan kir ku ev pêvajo ji bo xizanan veguheriye rewşeke dijwar.
Berdevka Meclîsa Jinan a HDP’ê Ayşe Acar Başaran tevdîrên li dijî vîrûsa koronayê li Tirkiyê hatine wergirtin ji aliyê jin û kedkaran ve nirxand.
Başaran destnîşan kir ku desthilatdarî bi rengekî ne-cidî nêzî pandemiyê dibe û got:
Di rewşekê de ku rojeva tevahiya cîhanê pandemî ye, mîna ku corona ‘bandorê li Tirkiyê nake’ nêzîkatî tê nîşandan.
Tirkiye bi rengekî tevdigere ku qet corona bandorê lê neke. Desthilatdarî kete nava nêzîkatiyeke wiha ya ne-cidî.
Desthilatdariyê saziyên pispor ên mîna Yekîtiya Tabîbên Tirk li derve hişt û li gorî xwe ‘desteya zanistiyê’ ava kir û biryar da ku pêvajoyê bi vî rengî bi rê ve bibe.
Başaran bal kişand ser banga ‘li malê bimîne’ ya desthilatdariyê û destnîşan kir ku tundiya li jinê herî zêde li malê tê kirin û got:
Yekane tişta hat kirin piştî vê bangê, belavkirina kolonya bû.
Li gel vê yekê ji bo karker û kedkarên ku neçarin bixebitin tu tedbîr nehatin girtin, tu piştgirî nehate dayin.
Yên ku rewşa xwe ya aborî baş e li malê man, lê ev pêvajo ji bo xizanan veguherî rewşeke gelekî dijwar.
Vê pêvajoyê herî zêde bandor li jinan kir. Jinên ku piraniya wan xizanin û bi rengekî ne-ewle dihatin xebitandin, yan ji kar hatin derxistin yan jî neçar hatin hiştin ku bêyî heqdest bikevin destûrê, bi vê yekê re ji aliyê aborî ve jin zêdetir xizan bûn.
Weke ku tê zanîn piraniya bûyerên tundiyê ji aliyê xizmên jinan ve tên kirin..
Ayşe Acar Başaran diyar kir ku jin divê di vê pêvajoyê de piştevaniyê xurt bikin û got: Em dernekevin derve jî, li hev rast neyên jî, divê em piştevaniya xwe xurt bikin.
