Li Iraqê aloziya siyasî hîna jî dewam dike.Heta niha aliyêan siyasî nekarîne hikûmetekê lihevkirî ava bikin.
Mistefa El-Kazimî ku herî dawî ji bo avakirina hikûmetê hatiye erkdarkirin, navên hin kesên ku di hikûmeta wî de cih bigrin eşkere kir. Di van wan de 3 Kurd hene.
Aloziya siyasî ya Iraqê dewam dike û heta niha ji ber nelihevkirina alisyên siyasî, hikûmeta nû nehatiye avakirin.
Piştî binkeftina du kesan, herî dawî Mistefa EL-Kazimî ji bo avakirina hikûmetê hat erkdarkirin.
Bi wergirtina erka xwe re El-Kazimî ji bo avakirina hikûmetê li gel aliyên siyasî, dest bi danûstandina kir.
Piştî ku El-Kazimî li gel 7 aliyên Şîe yên Iraqê civiya, îro navê hinek wezîrên kabîneya xwe eşkere kir.
Li gorî lîsteya ku hatiye parvekirin, mîna kabîneya niha 3 wezaret para Kurdanin û ji bo wê 3 wezîrên Kurd hatine destnîşankirin.
Namzetê Wezîrê Darayî: Fûad Hisên
Namzetê Wezîrê Dadê: Xalîd Şiwanî- Rizgar Mihemed Emîn
Namzeta Wezîra Şaredariyê: Rêzan Mihemed (Niha Wezîra a Şaredariyan a Herêma Başûre Kurdistanê ye).
Ji bilî van, navên namzetên 15 wezaretên din jî hatine eşkerekirin.
Lê belê navên namzetên wezîrên 5 wezaretan ku wezaretên hindirîn û parastinê jî di nav de ne, hîn nehatine diyarkirin.
Li gorî agahiyan duh Mistefa El-Kazimî li gel Serokê Hevpeymana Dewleta Yasa Nurî Malikî, Serokê Hevpeymana Fetih Hadî Amirî, Serokê Koma Sedr Ednan Fayhan, Serokê Desteya Siyasî Tevgera Sedir Nesar Rubeyî, civiyaye.
Lê Serokê Tevgera Hîkme Emer Hakîm amade nebû.
Li gorî agahiyan El-Kazimî daxwaz ji aliyan kiriye ku pêşniyar û bernameyên xwe yên ji bo kabîneyê pêşkêş bikin.
Her wiha Kazimî gelek hevdîtin li gel berpirsên partî û aliyên siyasî kiriye.
Beriya niha şandeyek ji hikûmeta Herêma Başûrê Kurdistanê jî li gel Mistefa El-Kazimî civiya bû û paketek a ji çend xalan pêk dihat, peşkêşî wî kirîbû.
Hêjayî gotinê ye, di 9’ê Nîsanê de Serokkomarê Iraqê Dr. Berhem Salih, Mistefa El-Kazimî ji bo avakirina hikûmeta Iraqê ya nû erkdar kir.
Beriya ku dema wî ya destûrî bi dawî bibe divê El-Kazimî kabîneya xwe amade bike û ji bo dengdan û dayîna baweriyê, pêşkêşî parlementoyê bike.
