Rojeva sereke ya sala 2020’an vîrûsa Corona, hîna jî bi bandor li welatên cîhanê belav dibe. Li Amerîka ku di rêza yekemîn a pêketî û qurbaniyan de ye, çalakiyên li dijî tedbîran jî didomin.
Serokê Amerîka jî hêvî dike ku jimara miriyan, 100 hezarî derbas neke. Li Çînê jî jiyan her ku diçe ber bi asayîbûnê ve diçe.
Vîrûsa Corona ku cîhan hemû daye berxwe, tevî li hin cihan kêm bûye, lê hin cihên din di asteke mezin de belav dibe.
Di rêza yekemîn de jî, Amerîka ku jimara pêketiyan milyonek derbas kir, cih digre.
Serokê Amerîka Dunald Trump hêvî kir ku jimara kesên ji ber vîrûsê jiyana xwe ji dest didin, 100 hezarî derbas neke.
Li Amerîka nerazîbûnên li dijî şidandina tedbîran
Li gel zêdebûna jimara qurbaniyan li Amerîka, nerazîbûnên li dijî şidandina tedbîran jî dewam dikin.
Li Wîlayeta New Yorkê ku herî zêde ji vîrûsê bandor bûye, li pêşiya mala walî, çalakiya nerazîbûnê hat lidarxistin.
Li Almanya gelek çalakger hatin binçavkirin
Li Ewropa jî ku bandorek mezin ji ber vîrûsê dîtiye, lê dîsa jî nerazîbûnên li dijî şidandina tedbîran tên lidarxistin.
Li Paytexta Almanya Berlînê, çalakiyek hat lidarxistin.
Polîsan gelek çalakger binçav kirin.
Çîn henaseyên jiyanê dikşîne û cihên tûrîzmê tên vekirin
Çîna ku vîrûsê jê derket û li cîhanê belav bû, êdî ji vîrûsê xilas bûye.
Li bajarê Shanghai gelek cihên tûrîzmê deriyên xwe vekirin, kêm be jî careke din tevgera tûrîstan vejîn bû.
Li Afganistanê tevî metirsiya vîrûsê, nimêja komî hat kirin
Ji bo pêşîlêgirtina belavbûna vîrûsê li tevahiya cîhanê cihên îbadetê hatin girtin û nimêja komî hatiye qedexekirin.
Lê li Afganistanê tevî metirsiya belavbûna vîrûsê, nimêja komî hat kirin û tedbîrên li dijî vîrûsê li ber çavan nehatin girtin.
Heta niha li tevahiya cîhanê, jimara kesên ku bi vîrûsê ketine nêzî 3 milyon û nîvan dibe, jimara kesên jiyana xwe ji dest dane jî, 250 hezar bûye.
Her wiha zêdeyî milyonek û 93 hezar kes jî rihet bûne.
