Vîrûsa corona li Bakur, Başûr û Rojhilatê Kurdistanê hîna jî belav dibe. Li Tirkiye û Bakurê Kurdistanê ketin û derketina 30 bajarên mezin rojek din hat dirêjkirin. Li Îranê jî vîrûsê dawî li jiyana 47 kesên din anî.
Li Başûrê Kurdistanê ji bo pêşîlêgirtina vîrûsa corona, tedbîran tên zêdekirin.
Li Kerkûkê piştî zêdebûna rewşên nû yên pêketiyên vîrûsê, Şaneya Krîzê ya Kerkûkê îro derbarê tedbîrên ji bo pêşêlêgirtina vîrûsa coronayê de civînek pêk anî.
Di civînê de biryara qexedeyê hat girtin.
Qedexe sibe saet 06.00’ê sibehê destpê dike û wê heta Şemiyê, berdewam bike.
Li Kerkûkê di nava 3 rojên borî de 15 kes bi vîrûsa coronayê ketine.
Li gorî wezaretê, heta niha li Başûrê Kurdistanê jimara kesên bi Coronayê ketine gihaşt 387 kesan, ji wan 5 kes mirine û 330 kes jî baş bûne.
Desthilatdariya Tirk agahiyên rast parve nake
Li Tirkiyê û Bakurê Kurdisatanê jî vîrûs di asteke metirsîdar de belav dibe.
Lê belê tê gotin ku dewleta Tirk daneyên rast parve nake.
Li gorî daneyên fermî yên dewletê heta niha 124 hezar û 375 kes bi vîrûsê ketine û 3 hezar û 336 kes jî mirine.
Li Tirkiyê qedexeya derketinê rojek din hat dirêjkirin
Wezareta Karên Hundir a Tirkiyê weke tedbîrên li dijî vîrusa coronayê ketin û derketina navbera 30 bajarên de rojek din dirêj kir.
Wezaretê ragihand ku biryara astengkirina ketin û derketina nava bajaran dê heta duşemê bidome.
“Li girtîgeha panûsê bi ava qirêj paqijiyê dikin”
Rêxistinên parazvanên mafên mirovan li Bakurê Kurdistanê bi raporekê diyar kirin ku li Girtigeha Patnosê li dijî talûkeya şewba vîrûsê tedbîr nayên girtin u paqijiya derdorê jî bi ava qirêj tê kirin.
Rêxistinan got:
“Tedbîrên ku têne girtin têr nakin û jimara girtiyan pir zêde ye.
Paqijî kêm e û jiyana girtiyan di xeteriyê de ye.”
Vîrûsê jiyana 47 kesên din bi dawî kir
Bîlançoya vîrûsê ya li Îranê îro ji rojên din kêmtir e, lê hîna jî bilind e.
Li gorî agahiyên fermî di nava 24 saetên de 976 kesên din bi vîrûsê ketine û 47 kes jî mirine.
Li gorî vê heya niha li Îranê 97 hezar û 424 kes bi vîrûsa coronayê ketine û 6 hezar û 203 kesan jî jiyana xwe ji dest dane.
Her wiha hat raghandin ku li Îranê heya niha 20 zarokên nû jidayîk bûyî, bi vîrûsa coronayê ketine û nêzî 500 dayîkên dûcanî bûn û bi coronayê ketine di nexweşxaneyan de ne.
