Vîrûsa corona bandora xwe li ser beşên din ên Kurdistanê û herêmê didomîne. Tevî rewşa xirab li girtîgehên Tirkiyê girtiyên nexweş nayên berdan. Li Îranê jî jimara pêketiyan 100 hezar derbas kir û herî dawî 78 kesan jiyana xwe ji dest da.
Vîrûsa Corona hîna jî li Başûrê Kurdistanê neketiye bin kontrolê û rewşên nû tên tomarkirin.
Ji bo pêşîlêgirtina vîrûsê, kesên ji dervey welat dihatin herêmê, 14 rojan dixistin bin çavdêriyê.
Hemû lêçûna rojên çavdêriyê jî, li ser hikûmetê bû.
Lê tê gotin, hikumetê biryar daye hemû lêçûn li ser welatiyan bi xwe be.
Rêveberê Navenda corona ya parêzgeha Helebçeyê diyar kir ku ev biyar wê ji bo her kesî ne derbasdar be.
Li Herêma Başûrê Kurdistanê heta niha bi giştî 391 kes bi virûsê ketine, ji wan 343 kes baş bûne û 5 kesa jiyana xwe ji dest daye.
Her wiha 43 nexweş jî niha di bin çavdêriya bijîşkan de ne.
“Li Rihayê pêdiviyên paqijiyê nadin girtiyan”
Vîrûs li Tirkiyê jî belav dibe û rojane herî kêm bi dehan kes jiyana xwe ji dest didin.
Lê dewleta Tirk hîna jî daneyên rast vedişêre.
Li gorî daneyên ku belav kirine heta niha, 129 hezar û 491 kes bi vîrûsê ketine û 3 hezar û 520 kesan jî jiyana xwe ji dest dane.
Ji rewşa belavbûna vîrûsê herî zêde girtî bandorê dibînin.
Bi taybet girtiyên nexweş ku nayên berdan.
Parlementera HDP’ê Ayşe Surucu, diyar kir ku li Girtîgeha Tîpa T a Rihayê amûrên paqijiyê nadin girtiyan û got, ji bo çareserkirina vê pirsgirêkê jî li holê muxatab tune ye.
Girtiyê nexweş Sabrî Kaya: Êdî hêza min nema ye, ez ê bimrim
Girtiyê nexweşê giran Sabrî Kaya jî ku li Girtîgeha Hejmara 2 a Tîpa T a Osmaniyeyê dimîne, di axaftina bi telefonê ya heftane ya bi malbata xwe re rewşa xwe ragihand.
Kaya, ragihand ku êdî hêza wî nemaye û wê bimire.
Keça wî Dîlan Kaya got:
“Rewşa bavê min gelek xedar e. Dibe ku agahiya mirina wî ji me re bê.
Dema li me geriya û vê rewşa xwe ji me re ragihand weke malbat em gelek nebaş bûn.
Piştî vê yekê em bi daxwaza ku bi rêveberiya girtîgehê re hevdîtin pêk bînin çûn Osmaniyeyê.
Lê midurê girtîgehê bi me re hevdîtin nekir.
Bila bavê min nemire. Me bê bav nehêlin. Serbest berdin, bila nemire.”
Kaya, di 42 rojan de 3 caran kirin beşa lênêrîna awarte.
Îro jî di encama hevdîtinan parêzeran a bi rayedarên girtîgehê re, Kaya cara 15. rakirina nexweşxaneyê.
Li Îranê jimara pêketiyên vîrûsê 100 hezar derbas kir
Li Îranê jî jimara pêketî û qurbaniyan bilind e.
Li gorî daneyên fermî, di nava 24 saetên dawî de hezar û 680 kes bi corona ketin û 78 kes mirine..
Bivî awayî jimara kesên bi coronayê ketine bû 101 hezar û 650 kesan.
Jimara pêketiyan jî bû 6 hezar û 418 kes..
Her wiha li welat rewşa 2 hezar û 735 kesan jî xirabe.
