Îro salvegera 45. a yekem jina Kurd a ku berdêla azadiya Kurdistanê daye.. Leyla Qasim, dektatorî û dijminatiya Rejîma Baas a Iraqê qebûl nekir.. Weke jinekê serî li hemberî wê rejîmê rakir.
Lewma Rejîma ku xwe li ber vê berxwedanê ranegirt, Leyla Qamsim bi dar vekir..Lê belê, navê Leyla ma û bi sedan kesî da ser rêya wê…Ji lewre mirov dikare bêje dîrok bi nasname û têkoşîna Leylayên şoreşger dubare dibe.
Leyla Qasim..yekem jina Kurd e ku bi destê dagirkerên Kurdistanê hat bidarvekirin.
Jina têkoşer Leyla, 27’ê Çileya 1952’yan li gundê Bamîlî yê Xaneqînê ji dayîk bû.
Wê demê, Rejîma Beas a Îraqê siyaseta tunekirina Kurdan dimeşand.
Ji ber vê, ew tevî malbata xwe koçberî Bexdayê dibe, li wir jî beşa civaknasî ya Fakulteya Wêjeyê dixwîne.
Leyla bi rêya hevalekî xwe, Partiya Demokrat a Kurdistanê nas dike û dest bi têkoşîna siyasî dike.
Piştî hilweşandina peymana 11’ê Adara 1970’yî ya navbera hikumeta Iraqê û Mela Mistefa Barzanî ku li gorî wê hikumetê hebûna kurdan qebûl dikir, tevahî hevalên wê yên partiyê, neçar man ji Bexdayê derkevin.
Leyla biryarê dide ku li wir bimîne û têkoşîna xwe ya li dijî rejîma dîktator bidomîne.
Pê re hewl da têkiliyê bi hevalên xwe re çêke da partiyê ji nû ve dûrî çavên saziyên ewlehiyê bi rêxistin bike.
Lê koma ciwanan nedikarî xebata xwe ya siyasî heta demeke dirêj bidomîne.
Desthilata rejîmê, 4 endamên partiyê jê Leyla Qasim girtin.
Şeva 24’ê Nîsana 1974’an hêzên rejîma Baasê, mala Leyla dorpêç kir û ew girtin.
Leyla rastî her cure êşkenceya giran hat û bi gelek sûcan hat tewanbar kirin, tenê ji bo ku radest bibe.
Leyla Qasim bi van gotinan bersiv da:
“Ez ne sûcdar im, ez têkoşerek im, ji bo doza xwe ya rewa; doza Kurdî kar dikim, di oxira vê dozê de, ez ê giyanê xwe feda bikin.”
Leyla di serdana bi malbata xwe re, cilekî Kurdî û tayek ji porê xwe qut dike û dide xwişka xwe da ku bibin şahidên têkoşîna wê.
Ji bo cilê Kurdî jî dibêje:
“Piştî çend rojan ez ê bibim bûka Kurdistanê, ji ber vê yekê dixwazim ku ax min bi hemû bedewiya xwe min hembêz bike.”
12’ê Gulana 1974’an, Leyla Qasim bêyî ku bibin dadgeha qanûnî, bi cilên wê yên Kurdî bidarvekirin.
Leyla bi serbilindî diçe ber sîdarê û bi dengekî bilind peyva “Kurdistan” qîr dike.
Bi vê yekê, têkoşer Leyla Qasim ji tevahî jinên Kurd û gelê xwe re dibe mînaka berxwedanê.
Leyla li goristana Geliyê Selam ê bajarê Necef dûrî war û malbata xwe, hate veşartin.
Li ser şopa wê bi sedan jin, navê wê rakirin û berxwedan û têkoşîna wê didomînin.
