Di 24 saetan de, li Başûrê kurdistanê 18 rewş hatin tomarkirin

Metirsiya ji ber belavbûna vîrûsa corona li Başûrê Kurdistanê didome û 18 rewşên nû hatin tomarkirin. Li Tirkiyê jî tevî belavbûna vîrûsê girtiyên nexweş ne tên dermankirin û ne jî tên berdan. Her wiha li Îranê jî bi hezaran kes bi vîrûsê ketin û bi dehan kes jî mirin.

Vîrûsa Corona ku heta niha li seranserê cihanê derbasî 5 milyon û 123 hezar kesî bûye, dawî li jiyana 330 hezar kesî aniye.

Li kurdistan û welatên cîran jî rewşa belavbûna vîrûsê dewam dike.

Ji ber belavbûna vîrûsa corona rewşa metirîsdar a li herêma Başûrê Kurdistanê didome.

Wezareta Tendursiyê ya Herêma Başûrê Kurdistanê raghand ku di nava 24 saetên dawî de, 18 rewşên nû hatin tomarkirin.

Ji wan 15 li Hewlêrê û 3 jî li Silêmaniyê.

Li gorî wezaretê heta niha li herêma Başûrê Kurdistanê ٤٤٢ kes bi vîrûsê ketine, 5 ji wan mirine û 383 kes jî rihet bûne.

Her wiha 54 kes jî di bin çavdêriyê de ne.

“Di cejnê de çûnûhatina di nava taxan de jî qedexe ye”

Li aliyê din Wezîrê Tendurisiyê yê Herêma Başûrê Kurdistanê Saman Berzencî raghand ku qedexeya derketinê di rojên cejnê de çûnûhatina kesan a di nava taxan de jî digre nava xwe.

Berzencî diyar kir ku qedexe tenê hêzên ewlehiyê û ekîbên tenduristiyê nagre nava xwe.

Rewşa girtiyên nexweş xirab e

Li Tirkiye û Bakûrê Kurdistanê jî hîna vîrûs bi lez belav dibe.

Li gorî daneyên ku desthilata Tirkiyê dane, heta niha zêdeyî 152 hezar û 587 kes bi vîrûsê ketine û 4 hezar û 222 jî mirine.

Bi belavbûna vîrûsa corona re li Tirkiyê qanûna înfazê ket mertiyetê.

Lê belê girtiyên siyasî û bi taybet ên nexweş nexistin ber vê qanûnê.

Belavbûna vîrûsê re, rewşa girtiyên nexweş xirabtir dibe û metirsiya li ser jiyana wan zêdetir dibe.

Girtiyê nexweş Mehmet Salîh Fîlîz, diyar kir ku ji ber binpêkirina mafan parve kiriye wî dernaxin nexweşxanê.

Filiz, anî ziman ku dermanê wî xelas bûne û bijîşk gotiye ‘Tişt nabe’ û kenê xwe bi wî kiriye.

Fîlîz her wiha da zanîn ku qawîş nayên dermankirin û paqijkirin.

Îran..Vîrûsê dawî li jiyana 66 kesên din anî

Li Îranê jî rewşa xeter dewam dike.

Tenê di nava 24 saetên dawî de, 2 hezar û 392 kes bi vîrûsê ketin û 66 kesan jî jiyana xwe ji dest dan.

Heta niha li Îranê bi giştî 129 hezar û 341 kes bi vîrûê ketine û 7 hezar û 249 kesan jî jiyana xwe ji dest dane.

Wezareta Tendurisiyê ya Îranê raghand ku heta niha, nêzî 10 hezar xebatkarên tendurisiyê jî bi vîrûsa corona ketine.

Back to top button