Meclîsa Jinan a HDP’ê ya Şirnexê û aktîvîstên TJA’yê li dijî êrîşên li hemberî jinê daxuyaniyek dan û gotin: Dewlet çawa çekên xwe yên zilmê nîşanê me dide, em jî deng û awazên xwe yên berxwedanê bilind dikin. Em ê li hemberê komkujiya jinê bêdeng nabin.
Bertek û nêrazîbûnên li hemberî girtina siyasetmedar, aktîvîstên Tevgera Jinên Azad, endam û rêveberên Komeleya Jinan a Rosa yê didomin.
Meclîsa Jinan a HDP’ê ya Şirnexê û aktîvîstên TJA’yê li dijî girtin, êrîş û tundiya li hemberî jinê xwestin li Kolana Hunerê ya Şirnexê daxuyaniyê bidin, lê polîsan daxuyanî asteng kir.
Li dijî astengiya polîsan, jinan berê xwe da Qada Mesîreyê, li vir zincîra xemrî ava kirin û daxuyanî dan.
Di çalakiyê pankartên “Komkujiya jinê polîtîk e”, “Ji tundiya jinê re na” û “Li dijî tundiya mêr û dewletê em serî radikin” hatin rakirin.
Di çalakiyê de parlamentera HDP’ê ya Şirnexê Nuran Îmîr daxuyanî da, bal kişand ser şîdeta li hemberî jinê û got:
Di meha çileyê heta îro 170 jin hatin kuştin. Sedî 70’ê jin ji aliyê hevjînê xwe ve hatin kuştin. Sedî 30 jin jî hêj kujerên wan ne diyar in. Aqûbeta kiryarên jinan nayê zanîn.
Di meha gûlanê li Tirkiyê 21 jin ji aliyê mêran ve hatin kuştin. Nayê zanîn ku ev jin ji aliyê kî ve hatin kuştin.
Destirijiya li hemberî jinê û qanûnên ku îro li Tirkiyê hene hêzê dide kujerê jinan. Em bêdengiya komkujiya li dijî jinê qebûl nakin.
Nuran, bal kişand ser êrîşa li dijî Komeleya Jinan a Rosayê û wiha li daxuyaniyê zêde kir:
Komeleya jinan li herêmê li dijî şîdeta li hemberî jinê xebateke girîng dida meşandin û jinên li herêmê dijîn xwe digihandin komeleyê. Saziyên me yên jinan bi KHK’ê hatin girtin û xebatkarên saziyan dîl hatin girtin.
Êrîşa ku li dijî Rosayê hat kirin ne jî rêzê ye. Ew dixwazin dengê jinan der-nekeve. Naxwazin jin xwedî li mafê xwe derkeve.
Nuran dawiyê got: Ger ku hûn çekên xwe yên zilmê nîşanê me bidin emê jî deng û awazên xwe yên berxwedanê bilind bikin. Em ê li hember desteser kirina vînê û komkujiya jinê bêdeng nebin.
Daxuyanî bi dirûşmeyan bi dawî bû.
