Şandeya NY a li Lîbyayê diyar kir ku çeteyên dewleta Tirk, bêhtirî 10 hezar kes girtine. Mismarî jî li ser rûpela xwe ya Facebookê, dîmenek belav kir ku tê de çete êşkenceyê li girtiyan dikin. Fransayê jî diyar kir ku binpêkirinên dewleta Tirk, wê bê bersiv nemînin.
Şandeya NY a li Lîbyayê ragihand ku 10 hezar kes di girtîgehên çeteyan de ne.
Şandeyê ji bo vê yekê, daxwaza lîpirsîneke navnetewî kir.
Beriya vê jî, berdevkê Artêşa Niştimanî ya Lîbyayê Ehmed Mismarî, binpêkirinên ku çeteyên dewleta Tirk pêk tînin, eşkere kir.
Mismarî li ser rûpela xwe ya Facebookê, dîmenek belav kir û ku tê de çeteyên dewleta Tirk êşkenceyê li xelkên bajarê Tawirga dikin.
Sêşema borî, Hikumeta Wîfaqê ya Ixwanî, cara yekem li xwe mikur hat ku, hin binpêkirin li bajarê Terhûnayê pêk hatine.
Cara yekem Wîfaq li binpêkirinên xwe mukur tê
Wezîrê Hundir ê Wîfaqê Fethî Paşaxa ragihand, tiştê ku endamên ewlekariyê li Terhûnayê kirine, binpêkirina mafên mirovan e.
Di heman çerçoveyê de, serokwezîrê hikûmeta demkî ya Lîbyayê Ebdella El-Senî, binpêkirinên li rojavayê Lîbyayê ku bi destê çeteyên dewleta Tirk pêk hatine, şermezar kir.
Wezîrê Karên Derve yê heman hikûmetê Ebdil Hadî Lihwêc jî ragihand ku hemû bijarte ji bo bidawîkirina dagirkeriya dewleta Tirk vekirî ne û teqez kir ku Wîfaq hikûmeteke ne destûrî ye û dema wê bi dawî bûye.
Lihwêc bang li civaka navnetewî û bi taybet Yekîtiya Ewropayê kir ku berpirsyariya kirinên Tirkiyê li Lîbyayê rake, ji ber ku çeteyên Tirkiyê gefê li ewlehiya Ewropayê jî dixwin.
Fransa: Binpêkirinên dewleta Tirk wê bê bersiv nemînin
Girêdayî mijarê, berdevka Wezareta Karên Derve ya Fransayê Anîs Van Der Mol ragihand ku, Parîs bi hevkarên xwe yên Ewropî re, binpêkirinên dewleta Tirk lêkolîn dikin.
Van Der Mol teqez kir ku, ev binpêkirinan w bê bersiv nemînin.
Di demeke wisa de, Wezîrê Karên Derve yê Tirkiyê Mevlûd Çavûşoglu ragihand ku welatê wî wê hevkariya bi Wîfaqê re berfireh bike.
Li gorî Çavûşoglu, serdana wan teqezkirina piştgiriya Enqereyê a ji bo Terablusê bû.
Wezîrê Karên Dervê yê Tirkiyê eşkere kir ku, di serdana wî de, awayên hevkariya bi Wîfaqê re ya ji bo dema pêş a di warên meydanî, siyasî û aborî de hatine nîqaşkirin.
