Serokê Parlamena Lîbyayê, bi fermî, daxwaza destwerdana artêşa Misirê, li dijî çeteyên dewleta Tirk li Lîbyayê kir. Artêşa Niştimanî jî teqez dike ku wan esman û bejahiya Sêrtê bi temamî kontrol kiriye. Her wiha Komkara welatên Ereb di civîna xwe ya duh de, banga agirbesteke giştî li Lîbyayê kir.
Serokê Perlemena Lîbyayê Eqîle Salih bi fermî ragihand ku gelê Lîbyayê, destwerdana leşkerî ji Misirê dixwaze.
Salih teqez kir ku eger çeteyên dewleta Tirk êrîşî bajarê Sêrtê bikin, ew ê daxwaza alîkariyê ji artêşa Misirê bikin.
Berî çend rojan, serokkomarê Misirê El-Sîsî ragihandibû ku eger çeteyên dewleta Tirk ber bi bajarê Sêrtê ve biçin, ew ê destwerdana leşkerî li Lîbyayê bikin û êdî ev yek jî rewa ye..
Hingê gelek welatên Ereb û yên cîhanê destek da vê yekê.
Di heman demê de, hinek çavkaniyên Artêşa Niştimanî teqez kirin ku esman û bejahiya Sêrtê heta rojhilatê bajarê Misratayê, bi temamî li jêr kontrola Artêşê ye.
Komkara Welatên Ereb banga agirbesteke giştî kir
Ji bo rewşa dawî ya Lîbyayê jî, duh Komkara welatên Ereb bi serokartiya Sultanê Umanê, civîneke awarte li ser daxwaza Misirê li dar xist.
Di civînê de, 14 xal hatin destnîşankirin.
hin ji wan xalan wiha ne:
– Pêkanîna agirbesteke giştî li Lîbyayê.
– NY û civaka navnetewî aliyan neçar bike ku çeteyan ji xaka Lîbyayê derxînin.
– Ji bo çareseriya giştî, teqeziya li ser çareseriya siyasî.
– Destwerdanên derve û hêsankirina şandina çeteyan ber bi Lîbyayê ve hatin redkirin.
Ebû El-Xeyz: Em projeyên aliyên derve ji bo parçekirina Lîbyayê red dikin
Di civînê de, sekreterê giştî yê Komkarê Ehmed Ebû El-Xeyz axivî û teqez kir ku ew projeyên aliyên derve ji bo parçekirina Lîbyayê red dikin.
Ebû El-Xeyz destnîşan kir ku bi rêya şer wê ti çareserî pêk neyê.
Misir: Ji bo Lîbya nekeve di destên komên teror de, em di hewildanan de ne
Wezîrê Derve yê Misirê Samih Şikrî jî, teqez kir ku wê welatê wî hemû hewldanên xwe bike da ku Lîbya nekeve destê komên teror.
Tirkiye: Gotina Macron a “Tirkiye lîstika tirsnak dilîze”, jidestdayîna mejî ye
Li aliyê din, di navbera Tirkiye û Fransayê de zimanekî tûj tê bikaranîn.
Berdevkê Wezareta Karên Derve ya Tirkiyê, Hamî aksoy, li ser gotina Serokkomarê Fransayê, Macron, ku got, “Tirkiye di Lîbyayê de lîstikeke tirsnak dilîze”, axivî.
Aksoy got:
“Ji gotina Macron, em tiştekî tenê fêm dikin, ku ev gotin ji kesekî ku mejiyê xwe ji dest daye, tê.”
Berî du rojan Serokkomarê Fransayê Emmanuel Macron ev yek di kongreyeke çapemeniyê de gotibû û daxwaz kiribû ku pêşî li projeyên Tirkiyê li herêmê were girtin.
