Di demekê de ku dewleta Tirk bajarê Misratayê vedugherîne baregeheke leşkerî, şandina çek û çeteyan ber bi vî bajarî ve jî dewam dike û amadekariya êrîşê li ser bajarê Sêrtê dike. Hemwextî vê yekê, duh şêx û rûspiyên Lîbyayê serdana Qahîrayê kir û daxwaza destwerdana artêşa Misirê li dijî dagirkeriya dewleta Tirk li Lîbyayê, dubare kir.
Berdevkê artêşê Ehmed Mismarî duh Pêncşemê di civîneke çapemeniyê de axivî û da zanîn ku Tirkiyê bajarê Misratayê vedugherîne baregehekê û çeteyên xwe lê bi cih dike, ku li wir amadekariya operasyonên li ser Kevana Petrolê tê kirin.
Di demeke wisa de, nifşên çeteyan bi rêya balafirên dewleta Tirk, li dû hev digihêjin Misratayê û xwe ji bo êrîşa li ser bajarê Sêrtê amade dikin.
Berdevkê artêşa niştimanî diyar kir jî ku hêzên parastinê yên artêşê li rojavayê bajarê Sêrtê di amadebaşiyê de ne û teqez kir hêzên wan dikarin parastina bajêr bikin.
Mismarî herî da zanîn ku hîna dewleta Tirk çek û çeteyan dişîne Lîbyayê ew jî ji bo bi temamî dest deyîne ser petrola welêt..
Hêzên Sûdanê jî ragihand ku wan 12ê vê mehê, 80 çete di nav de Sûrî jî hene ku berê xwe didan çeperên şer ên Lîbyayê, girtin.
Her wekî li gorî hêzên Sûdanê, 15 mehê jî 80 çeteyên din hatin girtin.
Şêx û rûspiyên Lîbyayê serdana qahîrayê kir û daxwaza destwerdanê dubare kir
Di heman çarçoveyê de, ji bo piştgiriya parlemena Lîbyayê ku daxwaz ji Misirê kiribû destwerdanê li Lîbyayê bike, duh şêx û rûspiyên Lîbyayê serdana Qahîreyê kir û daxwaza destwerdanê dubare kir.
Şêx û rûspiyên Lîbyayê bi 3 şandeyan serdana paytexta Misir Qahîreyê kir û bi serokomarê Misirê Ebdulfetah El-Sîsî re civiyan.
Her sê şandeyan daxwaz ji El-Sîsî kir ku eger Tirkiye êrîşan bibe ser bajarê Sêrtê, yekser destwerdanê bike.
El-Sîsî jî teqez kir ku Sêrt û Cefra ji bo Misirê xêzên sor in û got:
“Ewlehiya Lîbyayê, ewlehiya me ye û êdî divê şandina çeteyan ber bi Lîbyayê ve were rawestandin”
Ji bo Lîbya nebe navendeke terorê jî, em ê destwerdanê bikin.
Sûdan: Me 80 kes ku dixwest tevlî çeteyên Lîbyayê bibin, girtin
Li aliyekê din, berdevkê Hêzên Destekdayîna Lezgîn ên Sûdanê Adem Mihemed Ahemed Salih ragihand, yakşema borî, wan 80 kes ku dixwest tevlî çeteyên Lîbyayê bibin, girtin.
Salih eşkere kir ku di nava van kesan de, 2 Sûrî hebûn û destnîşan kir ku di dema dawî de gelek kes berî didin Lîbyayê da ku weke çete kar bikin.
