Hikûmeta Misirê eşkere kir ku di nava 6 salan de li ser sînorê Lîbyayê 40 hezar çete kuştine û ji bo parastina ewlehiya xwe ji bo her tiştî amade ne.
Li aliyê din, Serokomarê Tirkiyê Erdogan jî piştgiriya xwe ji bo Hikûmeta Wîfaq ya Ixwanî ya Lîbyayê dubare kir. Komkara Ereb jî ragihand ku ew qebûl nakin Lîbya bibe Sûriyeke din.
Duh şêx û rûspiyên Lîbyayê serdana Qahîrayê kiribûn û bi serokomarê Misirê Ebdulfetah El-Sîsî re civiyan bûn.
Şêx û rûspiyan ji bo çareseriya li Lîbyayê El-Sîsî weke nûnerê xwe pênase kir.
El-Sîsî jî ragihand ku wê nehêle Lîbya bibe navendeke terorê û ji bo wan bajarên Sirt û Cefrayê yên Lîbyayê xetên sor in.
Îro jî, Berdevkê Serokomariya Misirê Besam Razî, destnîşan kir ku Serokomarê Misirê El-Sîsî ji bo parastina ewlehiya Misirê ji bo her tiştî amade ye.
Besam Razî eşkere kir ku artêşa Misirê di nava 6 salan de derdora 10 hezar tirmpêlên ku çete tê de hebûn û xwestin derbasî Misirê bibin li ser sînorê bi Lîbyayê ve teqandine.
Razî anî ziman ku derdora 40 hezar çete bi ser sînorê Lîbyayê ve hatine kuştin.
Erdogan, Misir û Îmarat li Lîbyayê bi avêtina gavên ne rewa tawanbar kir
Ji aliyê xwe ve, Serokomarê Tirkiyê Recep Tayyîp Erdogan îro di axaftineke xwe li Stebolê, Misir û Îmarat tawanbar kir ku ew gavên nerawa û nayên qebûlkirin li Lîbyayê pêk tînin.
Her wiha careke din Erdogan piştgiriya xwe ji bo Hikûmeta Wîfaqê ya Ixwanî ya Lîbyayê dubare kir û got ku wê tifaqê nû bi Wîfaqê re îmze bikin.
Komkara Ereb: Em qebûl nakin ku Lîbya bibe Sûriyeke din
Li aliyê din, Sekreterê Giştî yê Alîkar ê Komkara Erebî, Husam Zekî derbarê rewşa dawî ya Lîbyayê de destnîşan kir ku Lîbyayê ber metirsiyeke mezin ve diçe û ew qebûl nakin ku Lîbya bibe Sûriyeke din.
Husam Zekî got:
“Gefên destwerdanê yên li bajarê Sirtê ya Lîbyayê nîşan dide ku şerekî mezin li ber derî ye.”
