Cîgirê serokê Desteya Rêveber a MSD’ê Hikmet Hebîb li ser biryara vekirina deriyê Bab El-Hewa hişyarî da û diyar kir ku alîkariyên mirovî di destê çeteyan de dimînin. Hikmet Hebîb girêdana rêxistinên navneteweyî bi hêzên berjewendîperest re jî rexne kir û bang li wan kir ku careke din mijara vekirina dergehê di ber çav re derbas bikin.
Cîgirê Serokê Desteya Rêveber a MSD’ê Hikmet Hebîb hişyarî kir “vekirina deriyê Bab El-Hewa tenê ji bo derbaskirina alîkariyên mirovî ji bo Sûriyê, gaveke xeternak e û anî ziman ku ev biryara Konseya Ewlekariyê ne rast e û xeteriyê zêdetir dike..
Hebîb diyar kir ku biryarên Konseyê û hêzên naveteweyî nakevin berjewendiyên gelên Sûriyê û tenê xizmeta berjewendiyên dewleta Tirk û çeteyên wê dikin.
Cîgirê serokê Desteya Rêveber a MSD’ê îşaret bi girîngiya vekirina deriyê Til Koçerê kir û got:
“Diviyabû deriyên din wekî deriyê Til Koçer ku dikeve xizmeta tevahî gelê Sûriyê, bihata vekirin.
Ji ber alîkariyên ku derbasî herêmên Bakur û Rojhilatê Sûriyê dibin, digihêjin hemû welatiyên Sûriyê.
Lê Rûsya û Çîn, ji bo armancên xwe yê siyasî, li pêş vê yekê bûn asteng.”
Hikmet Hebîb: Rêxistinên Navnetewî girêdayî hêzên berjewendîperest in
Hikmet Hebîb diyar kir rêxistinên navneteweyî girêdayî hêzên berjewendîperset in û rewabûnê didin dagirkeriya Tirk ya li Sûriyê.
Hebîb diyar kir ku NY û hêzên navneteweyî di çarerserkirina aloziya Sûriyê de ne cidî ne, lê berevajî aloziyê kûrtir dikin û li ser hesabê gelên Sûriyê berjewendiyên xwe pêk tînin.
Cîgirê Serokê Desteya Rêveber a MSD’ê bang li rêxistinên navneteweyî kir ku bi berpirsiyariyên xwe rabin û careke din mijara vekirina dergehan di ber çav re derbas bikin.
