Parlamentera HDP’ê ya Êlihê û Berdevka Meclîsa Jinan Ayşe Acar Başaran diyar kir ku meseleya Îpek Er parçeyek ji siyaseta şer a li Kurdistanê ye û got; AKP-MHP’ê ji siyasetê, heta jiyana civakî, aboriyê hewl dide li her qada jiyanê mêr serwer bike. Desthilatdariya mêr di şer de destavêtinê li dijî jinan weke amûreke şer bi kar tîne.
Roj nîne li Tirkiyê jin rastî destdirêjî, tundî û kuştinê neyên.
Sedema sereke ya vê yekê jî ew e ku sucdar ji aliyê dewletê ve tê parastin.
Parlamentera HDP’ê ya Êlihê û Berdevka Meclîsa Jinan Ayşe Acar Başaran têkildarî peymana stenbolê, tundî ya li dijî jinê de axivî.
Ayşe Acar Başaran destnişankir ku berdana Çawişê tecawizkar Mûsa Orhan bi destê dewletê hatiye kirin û got;
“Em zanin ku desthilatdariya AKP-MHP’ê ji siyasetê heta jiyana civakî, ji aboriyê heta medyayê hewl dide li her qada jiyanê mêr serwer bike. Encama vê yekê jî bêguman tundî, destavêtin û destdirêjiya li jinan e.”
Ayşe Acar Başaran: Saziyên jinan hatin girtin
Ayşe Başaran bal kişand ser girtina saziyên jinan ên li Êlihê û tevahiya Kurdistanê û ev tişt anî ziman;
Êlih bajarekî welê ye ku demeke dirêj têkoşîna jinê lê tê meşandin, sazî hatin avakirin, li rêveberiya xwecihî sîstema hevserokatiyê hate bicihkirin, her wiha di nava van rêveberiyan de kooperatîfên jinan hebûn. Em dizanin ku xwekuştina Îpek Er banga li edaletê bû, ev yek ji xwe di nameya wê de jî eşkere tê dîtin.”
Ayşe Acar Başaran destnîşan kir ku bûyera li Êlihê divê di nava rêbazên şerê taybet de bê nirxandin
Meseleya Îpek Er heye; li gel polîtîkayên desthilatdariyê yên dijminatiya li jinan her wiha parçeyek ji siyaseta şer a li Kurdistanê ye.
Ji şerê herî kevn ê cîhanê heta şerê niha yê li Sûriyê, heta kiryarên DAÎŞ’ê, mêr di şer de destavêtinê li dijî jinan weke amûreke şer bi kar tîne.
Ayşe Acar Başaran diyar kir ku li gel van hemûyan tevgereke jinê ya berxwedêr heye û wiha bi dawî kir;
“Hem li Kurdistanê hem jî li Tirkiyê tevgereke jinê ya berxwedêr heye. Eger îro desthilatdariyê ji bilî nîqaşkirinê nekarî di der barê Peymana Stenbolê de tiştekî din bike. Eger hîn jî di destê me de hin destketî hene, ev yek bi saya vê berxwedêriyê ye.”
