Hewldanên aliyên Lîbî ji bo gihîştina lihevkirinekê ku dawî li aloziya welêt bine, dewam dikin.
Serokê Parlemana Lîbî Uqeyle Salih, encamên civînên li bajarê Montreux yê Siwîsreyê, weke bingeha danûstandinên Cinêvê, erênî nirxandin.
Artêşa niştimanî jî, ji bo jinûve-vekirina zeviyên petrolê, garantoriyeke Amerîkî û navdewletî dixwaze.
Serokê Parlemana Lîbî Uqeyle Salih ragihand, ku encmên civînên li bajarê Montreux yê Siwîsreyê, yên 7 û 9 Îlonê hatin lidarxistin, ji bo xêzkirina nexşerêyekê ji civînên Cinêvê re, erênî bûn.
Salih teqez kir, aliyan di van civînan de li hev kir ku her herêmek ji hersê herêmên Lîbî, wê nûnerê xwe di Meclîsa Serokatiyê de hilbijêre.
Her wiha di dema veguhêz de, wê bajarê Sirtê bibe navenda dezgehên qanûsaz, cibicîkar û banka navendî ya Lîbyayê.
Berya niha, Şandera NY bo Lîbyayê Stephanie Williams destnîşan kiribû ku beşdarên civînên Montreux li hev kirine ku hilbijartinên serokatî û parlemanê di nava 18 mehan de, werin lidarxistin.
Ji bo belavkirina dahatên petrolê, artêşa Lîbî daxwaza garantoriyan dike
Ji aliyê xwe ve, artêşa niştimanî ya Lîbî ragihand ku, ji bo jinûve-vekirina zeviyên petrolê û bendergehên girtî, ew garantoriyeke Amerîkî û navdewletî, derbarê belavkirina dahatên peterolê dixwaze.
Artêşa Lîbî banga mekanîzmeyeke zelal ji bo belavkirina dahatên petrolê li ser tevahiya gelê Lîbyayê kir û hişyarî da ku divê dahatên petrolê ji bo hêzên çekdar û çeteyan, neyên bikaranîn.
Ev yek di demekê de tê ku duh Washingtonê ragihandibû ku aliyên Lîbî lihev kirine ku dezgehên petrolê jinûve karê xwe dewam bike.
Ji ber rewşa xirab, li gelek bajaran xwepêşandan tên lidarxistin
Ev demeke gelê Lîbî rewşeke jiyanî ya dijwar dijî, ji lew re li gelek deveran, xwepêşandan tên lidarxistin.
Li bajarê Merc ê li rojhilatî welêt, ji ber qutbûna elekitrîkê û nebûna xizmetguzariyan, xwepêşandanên tund hatin lidarxistin.
Çavkaniyekê ji bajêr ragihan ku xwepêşanderan hewl da derbasî gerînendeya ewlekariyê bibin, lê hêzên ewlekariyê fîşek berdan esman û xwepêşander ji hev belav kirin.
Her wiha xwepêşandan li bajarên Terablus, Misrata, Zilêtin, Zawiye li rojava û li bajarên Benxazî, Beyda û Merc li rojhilatê welêt, hatin lidarxistin.
