Nerazîbûnên li dijî plana dagirkirina Şengalê ya di navbera PDK, Tirkiye û Iraqê de her diçe zêde dibin. Îro dîsa careke din pêkhateyên Şengalê li ber vê plane rabûn û meşek lidarxistin. Pêkhateyan daxwazên xwe pêşkêşkirin.
Gelên Şengal û bajaroka Til Izêr tevî nûner û rêveberên sazîyan û bi hemû pêkhateyên xwe li dijî peyman û planên qirêj ên li ser Şengalê meşiyan.
Girseya qelebalix, li Çerxerêya Qebayil ya navenda Şengalê kom bû û pankartên ku daxwazên wan tînin ziman vekirin û dest bi meşê kirin.
Girseya ku heta ber avahiya Qaymeqamtiya Şengalê meşiya, li vir daxuyaniyek da û daxwazên xwe bi 7 xalan eşkere kirin.
Daxwaz wê piştre pêşkêşî Neteweyên Yekbûyî, rêxistinên mafên mirovan werin kirin.
Daxuyanî li ser navê hemû pêkhateyan ji aliyê Hisên Hecî ve hate xwendin.
Piştî daxuyaniyê daxwaz bi 7 xalan wiha hat rêzkirin;
-Pêwîste hevalbendên me yên tevahiya welat, di çarçoveya destûr û qanûnên Iraqê de rêveberiya me ya xweser nas bikin. Pêwîste ev rêveberî yekser girêdayî hikûmeta navendî be.
-Ewlekariya herêmê divê ji aliyê gelê Şengalê û bi taybet ji aliyê kesên ku ji dema fermanê ve di hemên herî zehmet de li dijî DAIŞ’ê şer kirine û heta îro jî têdikoşin ve were rêvebirin.
-Divê hêzên Heşdî Şeebî li herêmê bimînin, bi taybetî divê hêzên Şengal rizgar kirine, şervanên Êzidî yên dijî DAIŞ şer kirine û tevlî rizgarkirina herêmê bûne, li herêmê bimînin. Pêwîste bawerî bi van hêzan were ku wê Şengalê biparêzin.
-Em naxwazin hêzên ku di dema şer de Şengal terikandine, dîsa vegerin Şengalê.
-Pêwîste mîsogeriya mafê kesên ku di fermanê de qurbanî dane, kesên hatine revandin, yên winda bûne, kesên hatine rizgarkirin bê dayîn. Her wiha pêdiviyên koçberên vedigerin Şengalê werin pêşwazîkirin. Dîsa 3’yê Tebaxê wekî roja betlaneya fermî ya li Iraqê were îlankirin.
-Tevî ku hemû komkujî û fermanan jî, ji li ser gelê Şengalê ji aliyê kesên ku destê wan di komkujiyê de heye ve peyman tên îmzekirin. Em van peymanan qebûl nakin.
-Em ti lîstok û plangeriyên li ser Şengalê qebûl nakin. Em aliyek van lîstok û plangeriyan nîn in, lewma pêwîste Şengal ji van planan were dûrxistin. Em Iraqî ne û dijî hemû cure planên ku Iraqê perçe dikin û xizmeta dagirkeriya li ser Iraqê dikin e. Em yekîtiya Iraqê diparêzin.
