Queen Mesto: Divê hêzên navnetewî sînorekî li ber binpêkirinên Tirkiyê deyînin

Serokê komîteya têkbirina terorê ya parlamena Belçîkayê Queen Mesto anî ziman ku dewleta Tirk mafên şêniyên li Bakur û Rojhilatê Sûriyê binpê dike û teqez kir, ew ê vê yekê rake hikumeta welatê xwe. Mesto ji bo rawestandina êrîşên Tirkiyê, ji hêzên navneteweyî xwest ku êrîşan paşguh nekin û sînorekî ji Tirkiyê re deynin. 

“Mafên şêniyên li Bakur û Rojhilatê Sûriyê ji aliyê Tirkiyê tên binpêkirin.”

Serokê komîteya têkbirina terorê ya parlamena Belçîkayê Queen Mesto yê serdana herêmê kiribû, vê yekê dibêje û îşaretê bi bêdengiya hêzên navnetewî û xeteriya Tirkiyê dike.

Lewma ji bo rawestandina van êrîşên hovane, Queen Mesto pêwîstiyê bi rawestandina Tirkiyê û mikurhatina li van sûcan, dibîne.

Mesto dibêje:

“Em nikarin çavên xwe ji binpêkirinên dewleta Tirk ên li dijî mafên mirovan û binpêkirina serweriya herêmê bigirin.

Ev tiştekî neqebûlkirî ye û me ev tişt di 2 rojên borî de dît.

Ez ê wê yekê di raporê de binivîsim û pêşkêşî hikumeta xwe bikim.

Ji ber êdî ev nayê ragirtin û paşguhkirin. ”

3ê Kanûnê, Mesto bi şandeya welatê xwe Belcîka re, serdana herêmê kiribû.

Hemxwextî vê serdanê, êrîşên dewleta Tirk li ser herêmê bi giştî û Eyn Îsayê bi taybetî pêk dihatin.

Queen Mesto: Divê bi piştevaniya navnetewî koçber vegerin warê xwe

Queen Mesto serdana xwe ji bo kampên koçberên Serê Kaniyê bi bîr xist û daxwaz ji hêzên navnetewî kir ku piştevaniya vegera koçberan li warên wan bikin.

Serokê komîteya têkbirina terorê ya parlamena Belçîkayê bang li DYA û hêzên navnetewî kir ku sînorekî ji êrîşên dewleta Tirk re deyînin.

Queen Mesto: Kurd qehreman in, pêwistiya wan bi piştevaniyê heye

Mesto dilsoziya xwe bi gelên Bakur û Rojhilatê Sûriyê re nîşan da, bi taybet gelê Kurd û piştrast kir ku pêwîst e piştevaniya herêmê ji bo sekna li hember xeteriyan bê kirin.

Mesto her wiha îşaret bi naskirina Rêveberiya Xweser jî kir, ku pêwîstiya wê bi parastina nasname û nirxan û bi piştevaniya têkbirina terorê heye.

Serdana vê şandeyê di wextekî de tê ku, tevgera diplomatîk li herêmê geş e û hêzên herêmê ji bo parastina gelên xwe ji êrîşên dagirkeriyê, li serê darê lingan in.

Lê ev serdanên navdewletî tenê têrê nakin, ji lew re Hevserokê Buroya Têkiliyên Derve ya Rêvberiya Xweser Ebdulkerîm Omer banga naskirina Rêveberiyê dike.

Back to top button