QSD’ê jî bi daxuyaniyekê ragihand ku hêzên wan ti êrîş nebirine ser hêzên peşmerge û diyar kir komek gerîla dema erka wan ya li Rojava ya li dijî DAIŞ’ê bi dawî bû vedigeriyan baregehên xwe li ser sînor ji aliyê pêşmergeyan de hatin dorpêçkirin û got, “Li ser vê yekê şerekî demkurt di navbera her du aliyan de derket, ji bo ev şer raweste aliyên peywendiyê yên girêdayî me destwerdan kirin û bi aliyê din re koordîne bikin da ku koma gerîla vegere baregehên xwe.”
Navenda Ragihandin û Çapemeniyê ya QSD’ê derbarê buyera ku 16’ê Kanûnê li herêma Sihêla ya ser sînorê Rojava û başûrê Kurdistanê de rû da daxuyaniyek weşand.
Di daxuyaniya QSD`ê de wiha hate diyarkirin:
“Di salên ku piştî destpêkirina operasyonên têkoşîna li dijî terora DAIŞ`ê de, li herdu aliyên sînor di navbera QSD’ê û Hêzên Pêşmergeyan ên girêdayî hikumeta Başûrê Kurdistanê de hertim makenîzmayeke koordîneya hevbeş hebû.
Bi saya wê koordîneyê gelek astengî û pirsgirêkên ku li herêmên sînorî dihatin rûdan, hatin derbaskirin.”
QSD: Bûyera nêzî herêma Sihêla ne êrîşek li dijî Pêşmergeyan bû
QSD`ê di daxuyaniyê da zanîn ku bûyera ku şeva 16`ê Kanûnê li nêzî herêma Sihêla ya li ser sînorê di navbera Rojava û Başûrê Kurdistanê de rû daye, ne êrîşek li dijî ti nuqteyên hêzên Pêşmergeyan bû.
QSD`ê diyar kir daxuyaniyên ku di çapemeniyê de hatine belavkirin, mijar ji rastî û rewşa ku rû daye mezintir kirin, tiştê ku rû daye tenê kêmbûna koordîneya di navber hêzên ewlekariyê yên li her du aliyên sînor bû.
QSD: Em hertim rêzê ji serweriya hikumeta Başûrê Kurdistanê ser xaka wê girtiye
QSD’ê wiha got:
“QSD’ê her tim rêz li hemberî serweriya hikumeta Başûrê Kurdistanê û hêzên wê yên leşkerî li ser xaka wê, girtiye.
QSD: Pirsgirêka li ser sînor bi destwerdana me bi dawî bû
Piştî koordîneya ji bo agirbestê di navbera komeke gerîlayan ku erkên xwe yên piştgiriya operasyonên têkoşîna li dijî DAIŞ`ê xilas kiribû û vedigeriya baregehên xwe, ew kom ji aliyê hêzên Pêşmergeyan ve hate dorpêçkirin.
Li ser wê yekê şerekî demkurt di navbera her du aliyan de derket, wê demê hin aliyên peywendiyê yên girêdayî QSD’ê destwerdan kir da ku wê şerî bisekinîn û bi aliyê din re koordîne bikin da ku koma gerîla bi ewlehî vegera baregehên xwe.”
QSD: DIvê koordîneya li ser sînor xurtir bibe
Navenda Ragihandin û Çapemeniyê ya QSD’ê diyar kir ku baweriya wan heye ku xurtkirina koordîneya di navbera hêzên li her du aliyên sînor de, garantiya tekane û ya pêwîst e ji bo nerûdana bûyerên bi vî rengî di dema pêş de, ku ew yek xizmeta berjewendiyên hevbeş û îstiqrar û ewlehiya sînor dike.
