Bi berdewamiya sûcên dewleta Tirk li dijî jinan, rewşa jinên li Efrînê dijwar û tehl bûye…
Mîna ku çeteyên DAIŞê bi jinên êzidî li Şengalê kirine, niha jî jinên Efrînî ji Lîbyayê re tên veguhestin û di karê fihûşê de tên bikaranîn.
Ev sûc jî di roporek Sky News’ê de hat eşkerekirin.
“Çeteyên dewleta Tirk jinên Efrînî dişînin Lîbyayê û di karê fihûşê de bi kar tînin.”
Tora Sky News’ê di raporeke xwe de vê yekê û gelek sûcên destavêtin jinan û revandina wan ji aliyê çeteyên Tirkiyê ve, eşker kirin.
Sky News’ê rapora xwe li gorî şahidiyên jinên Kurd yên ji girtîgehên Tirkiyê ve xelas bûne amade kiriye.
Di raporê de tê gotin ku” jinan, eşkere kirin ku erdê girtîgehan li Efînê bi xwîna ku ji ber destavêtina hovane derketiye, tijî bûye.”
Rojane bi dehan jin û yên ciwan dibin qurbanî, nexasim ên temen biçûk, bi awayekî hovane ku tu carî pêk nehatiye, çete dest davêjin wan.
Ev hemû sûc jî ku heya niha li hemû herêmên ku dewleta Tirk dagirkirine, bi erêkirina dewleta Tirk in.
Ev hemû sûcên li jina dikin ne bese, mîna çeteyên DAIŞ’ê bi jinên êzidî li Şengalê sala 2014an kiribûn, niha jî jinên Efrînê difiroşin bazirganên Qeterî.
Berî niha, di raporeke Efrîn Post de hate zanîn ku “çeteyan keça Kurd bi navê Selwa Ehmed Şaşo ya ji gundê Dargirê revand da wê bibin Tirkiyê û bifiroşin bazirganên Qeterê.
Lê malbata Selwa piştî çend rojan ji revandinê, keça xwe vegerand û plana çeteyên têk bir.”
Sky News’ê di rapora xwe diyar dike ku gelek jinên Kurd di girtîgehên çeteyan de winda ne û gelek ji wan birine Lîbyayê.
Yek ji van jinan jî Henaa ya ji navçeya Şêrawa ye çeteyan ew bi xwe re birine Lîbyayê…
Li gorî agahiyên di raporê de hatiye bi parvekirin, “Jinên revandî, bi rêya deriyê sînor ê Kilis, gundê Xelîl û deriyê Hemamê, derbasî Tirkiyê têne kirin.”
Rêxistina Mafên Mirovan a Efrînê gelek buyerên revandina jinan, destavêtin, kuştin jinan û avêtina cenazeyên wan di çolê de belege kirine.
Beriya çend hefteyan, çeteyan 7 jinên Kurd di nav de 4 jinên temenmezin ên ji gundê Gazê yê navçeya Reco ya Efrînê revandine.
NY jî di raporek xwe de hişyarî ji sûcên hovane ên çeteyên dewleta Tirk a dagirker li dijî Kurdên li Efrîn, Serê kaniyê û Girê Spî dabû û Enqere bi binpêkirina peymana mafên mirovan tawanbar kiribû.
