Endamê Desteya Hevserokatiya PYD’ê Aldar Xelîl diyar kir ku nabe ti hêzeke kurd bi dijminên kurdan re tevbigere û da zanîn divê kurd di demeke nêz de li hev rûnên bi diyalogê û yekîtiyê pirsgirikên xwe çareser bikin.
Aldar Xelîl diyar kir ku ewê sala 2021’ê bikin sala rizgarkirina herêmên dagirkirî.
Endmaê Desteya Hevserokatiya Partiya Yekitiya Demokratîk-PYD Aldar Xelîl bi hevpeyvînek li gel ajansa Hawarê sala 2020 nirxand.
Aldar Xelîl diyar kir ku ji bo wan Sala 2020`an giran û dijwar derbas bû, salekî tije têkoşîn derbas bû.
Xelîl got:
“Sala 2020`an bi dagirkirina Serêkaniyê û Girê Spî dest pê kir, her wiha bû saleke nexweşiya coronayê. Ev yek bandorekî gelek neyînî li salê kir.
Tevî hemû êrişan û astengiyan jî, di hêla aramiya civakî, aborî û aliyên din ên jiyanê de çavdêr vê herêmê wek serkeftî dinirxînin.”
Aldar Xelîl: Erdogan bi destê çeteyan dixwaze pêşî li pergala demokratîk bigre
Aldar Xelîl dazanîn ku Erdogan bi destê çeteyan armanc dike ku bajarên Rojava li ser axa xwe zêde bike û pêşî pergala demokratîk bigre û diyarkir wê nehêlin ku Erdogan bigîhîje armancên xwe.
Aldar Xelîl li dijî êrîşên hêzên dagirker yên li ser kurdan balkişand li ser xebatên yekîtiyê yên bi ENKS’ê re got:
Aldar Xelîl: Em naxwazin ku ENKS li eniya dagirkeran cih bigre
“Çûyîna Ebdulah Gedo ya Efrînê, ziyareta wî ya gorên serçeteyan û runiştina bi kujerê hevrîn Xelef re me gelek êşand. Ev yek nayê qebûl kirin.
Divê ENSK êdî helwesta xwe zelal bike. Gelo ENKS van kesan wek dagirker qebûl dike an na.? Yan jî qebûl dikin ku sibê ev herêm bêne rizgarkirin?
ENSK niha endamê eniya Koalîsyonê ya ku Efrîn, Serêkanî û Girêspî dagirkirî de cih digre.
Divê ENKS ji bo berjewendiyên kurdan bixebite. Rastî jî em naxwazin ENKS di wê eniya dijminê kurdan de cih bigre.”
Aldar Xelîl: Helwesta Mesrûr Barzanî ya derbarê YPG’ê de ne helwestekî netewî ye
Aldar Xelîl helwesta Mesrûr Barzanî ya derbarê YPG û QSD’ê de rexnekir û diyar kir ku dewsa ku Mesrûr Barzanî astengiya ji bo QSD YPG derxîne divê ji wan re alîkar be û got,
“Ev helwest ne helwestekî netewî ye. Hêviya me ji Mesrur Barzanî ne ew bû.”
Aldar Xelîl: Divê ti hêzeke Kurd nebe amûrê destê dewleta Tirk
Aldar Xelîl dazanîn ku çi tiştên li vê herêmê pêk tên, destê dewleta Tirk tê de heye. Xelîl diyar kir ku dewleta Tirk bi destê beşekî ji PDK’ê dixwaze Rojava dorpêç bike û bifetisînin.
Aldar Xelîl zelal kir ku ya herî baş ew e ku tu hêzeke Kurd nebe amûrê destê dewleta Tirk.
Aldar Xelîl diyar kir ku çênabe ti hêzekî kurd bi dijminên kurdan re tevbigerin û got, “Divê kurd di demeke nêz de li hev rûnên bi diyalogê û yekîtiyê pirsgirikên xwe çareser bikin.”
Endmaê Desteya Hevserokatiya Partiya Yekitiya Demokratîk-PYD Aldar Xelîl di dawî de hêvîkir ku sala 2021 bibe sala rizgarkirina herêmên dagirkirî yên li Rojava û bibe sala yekîtiya kurdan.
