Kampa Holê ku ji kampên herî metirsîdar di cîhanê de ye, penaberên Iraqî jî hewadine. Van penaberan dubare bang li hikumeta Iraqê kir ku xebatê ji bo vegera wan bimeşîne, ji ber ji mafê wan e li warê xwe vegerin. Di heman demê de, Rêveberiya Xweser jî, ji hikumeta Iraqê xwest ku gavên cidî ji bo çareserkirina dosyaya penaberên Iraqê yên di kampê de bavêje.
Li Kampa Holê, tenê jimara penaberên Iraqî, zêdeyî 30 hezarî ye.
Van penaberan berî niha gelek caran daxwaza vegera warê xwe kiriye, lê hikumeta Iraqê ev daxwaz, bi cih nedianî, lewma careke din bang li hikumeta Iraqê dikin ku wan vegerînin.
Fener Elgiêt: Em hêvî dikin Iraq ji bo dosya penaberên xwe gavên cidî biavêje
Li ser vê mijarê, Cîgirê Buroya Têkiliyên Karên Derve ya Rêveberiya Xweser a Bakur û Rojhilatê Sûriyê Fener El-Giêt axivî û destnîşan kir ku niha hejmara penaberên Iraqî yên li herêmên Bakur û Rojhilatê Sûriyê pir e.
Xelkê Iraqê jî ji ber terora çeteyên DAIŞ’ê û rêxistinên terorîst bi giştî, zehmetî dîtin.
Em û dewleta Iraqê cîran in û me êşa heman çeteyan kişandiye.
Jimara penaberên Iraqê pir zêde ye, bêhtirî 30 hezarî ye.
Helbet, hemû ne ji DAIŞ’ê ne. Hinek ji wan xwe li herêmên me yên ewle girtine.
El-Giêt da zanîn ku şandeyeke Wezareta Karên Derve ya Iraqê serdana herêmên Bakur û Rojhilatê Sûriyê kir, da dosya Iraqiyan çareser bike.
Em endamên Rêveberiya Xweser bi wan re alîkar bûn.
Şandeya Iraqî serdana kampa Holê kir, bi penaber, koçber û çeteyên Iraqî re axivî .
Wê demê derdora 5 hezar Iraqiyan navên xwe tomar kir û xwestin vegerin Iraqê.
Fener El-Giêt eşkere kir, hin penaber destpêkê ji ber şerê li Iraqê ditirsiyan ku vegerin wir û destnîşan kir ku derfetên Rêveberiya Xweser diyarkirî ne, lewra hêvî kir ku Iraq ji bo çareserkirina dosya penaberên Iraqî gavên cidî biavêje.
