Çalakiya xelkê Şengalê ya bi armanca destekdayîna Asayîşa Êzidxanê hatî destpêkirin, di roja xwe ya 58’an de berdewam dike. Şêniyên Şengalê diyar dikin heta daxwazên wan pêkneyên, ewê dev ji çalakiyên xwe bernedin.
Şandeya Rêveberiya Xweser a Şengalê jî ku li Bexdayê hevdîtinan didomîne, bi Serokwezîrê Iraqê yê berê Heyder Ubadî, Cîgirê Sefîrê Misrê û Sefîrê Rûsyayê re civiya.
Şandeyê bi pêşkêşkirina daxwaznameyekî ji aliyan xwest ku peymana li ser Şengalê were betalkirin.
Li dijî plana dagirkirina Şengalê ev 58 rojin xelkên Şengalê li ser piyane û diyar dikin ku li hember her plan û êrîşê wê li kêleka hêzên xwe bin û xaka xwe biparêzin.
Ciwanê bi navê Elî Xeyrî da zanîn ku hikûmeta Iraqê bi vê lawazbûna xwe dixwaze wan bê îrade bike, lê heta dawiyê li dijî siyaseta qirkirinê ya ku bi destê dewleta Tirk li Iraqê tê meşandin wê li ber xwe bidin.
Endama Meclîsa Jinan a komelgeya Zorava Nûrê Hecî jî diyar kir ku heta îradeya wan neyê naskirin ew dev ji berxwedana xwe bernadin.
Şengaliyan daxwazên xwe pêşkêşî Iraq, Misir û Rûsya kirin
Her wiha li dijî gef û êrîşên li ser Şengalê ev 4 roje şandeyek Rêveberiya xweser a Şengalê li Paytexta Iraqê Bexdayê ye. Şandeyê heta niha gelek aliyên siyasî re hevdîtin kirin.
Şandeya Şengalê herî dawî bi Serokwezîrê Iraqê yê berê Heyder Ubadî, Cîgirê Sefîrê Misrê û Sefîrê Rûsyayê re civiya.
Şandeyê bi daxwaznameyekê daxwazên xelkê Şengalê pêşkêşî rayedarên Iraqê, Misrê û Rûsyayê kir.
Şandeyê di daxwaznameya xwe de ji aliyên navborî xwestin ku peymana li ser Şengalê were betal kirin û got:
“Divê ev peymana kirêt were betal kirin ji ber ku ev peyman bê vîna xelkên şengalê di navbera PDK û hikûmeta Iraqê de pêk hatiye.
Xelkên şengalê kesên ku di dema êrîşên DAIŞ’ê de wan tenê hişt û reviya nema qebûl dike.
Divê li hember êrîşên li ser Şengalê hikûmeta Iraqê bi erka xwe rabe. Divê ji bo vegera Xelkên Şengalê li ser axa xwe, rêyên kampan were vekirin. ”
Şandeya Şengalê ji bo çareseriyê jî ev pêşnar kir:
Ji ber ku destûra Komara Iraqê federal e, di çarçoveya wê de divê qanûnek were derxistin û Şengal Xweser be.
Divê Asîmanê Şengalê li êrîşên derve re were girtin.
Divê Alîkarî û xurtkirina Yekîneyên Berxwedana Şengalê-YBŞ û asayişa Êzdîxanê weke misogeriyekê û dilsozî bi welatiyên Şengalê re were kirin.
